El Clasico - mundësi e artë për Benzema

Jo vetëm sepse ka qenë në epiqendër të këtyre ndeshjeve për nëntë edicione, por përtej kësaj, Karim Benzema e do përballjen El Clasico.

Barcelona është skuadra ndaj të cilës ka luajtur më shumë ndeshje, plot 26, në të cilat ka tundur nëntë herë rrjetën e blaugranave.

Mund të thuhet po ashtu se asi francez gjithmonë ka dhënë më të mirën në përballjet me kataluansit, ndërsa tani ka mundësinë të bëjë edhe më shumë.

I dyshuar në kualitet pothuaj që prej transferimit të tij në Santiago Bernabeu, këtë vit francezi ka marrë rrebesh kritikash për numrin e vogël të golave - vetëm 14.

Zinedine Zidane e ka mbrojtur vazhdimisht, duke theksuar se Benzema është më shumë se vetëm një tundës rrjetash, por hija e dyshimit i rri mbi kokë sot më shumë se kurrë.

Ai do të jetë titullar, edhe një herë tjetër, ndaj Barcelona, duke pasur mundësinë të shtojë numrin e golave, ndërsa Zidane pret më shumë se vetëm kaq.

Tekniku francez e sheh bashkëkombasin si armë të fshehtë ndaj kataluansve, nëse arrin të regjistrojë paraqitje të ngjajshme si ajo në fitoren e thellë ndaj Sevilla.