Ekspozitë e përbashkët e profesorëve të Fakultetit të Arteve dhe Universitetit Politeknik ''Svenska''

Fakulteti i Arteve i Universitetit të Prishtinës organizon hapjen e ekspozitës së përbashkët të profesorëve të Fakultetit të Arteve dhe atyre të Universitetit Politeknik ''Svenska'' të Suedisë. Kjo ekspozitë realizohet në kuadër të bashkëpunimit ndërinstitucional mes dy universiteteve, me synimin për të thelluar dhe forcuar shkëmbimin akademik dhe artistik midis pedagogëve dhe studiuesve të fushës së arteve, transmeton klankosova.tv. Ky projekt synon të krijojë një platformë të përbashkët për dialogun artistik, eksperimentimin krijues dhe shkëmbimin e praktikave bashkëkohore në artin vizual. Nën kurimin e Prof. Xhevdet Pantinës, ekspozita do të jetë e hapur për vizitorët për një periudhë prej një muaji, duke ofruar një hapësirë të pasur për reflektim, interpretim dhe diskutim mbi qasjet dhe konceptet bashkëkohore të artit. Kjo ngjarje akademike dhe kulturore, pasqyron angazhimin e dy institucioneve për promovimin e artit dhe shkëmbimit ndërkombëtar në fushën e krijimtarisë vizuale. Ekspozita do të hapet sonte më 17 shkurt 2025, në orën 19:00, në Galerinë e Fakultetit të Arteve, në kuadër të aktiviteteve kulturore për shënimin e Ditës së Pavarësisë së Kosovës.