Ekspozita ''Frymë'' sjell urbanizmin në lashtësi, tri teknika të ndryshme nga tre artistët kosovarë (FOTO)

Sot në orën 18:00 në ambientet e Amfiteatrit në Sheshin ''Zahir Pajaziti'', u hap ekspozita multidisiplinare e titulluar “Frymë”. Kjo ekspozitë, erdhi nga tre artistë kosovarë, Sali Shkupolli, Ilirjana Luzha dhe Flutra Hyseni, e cila prezantoi teknika të veçanta të punës nga të tre bashkautorët. Lidhur me specifikat e këtij bashkë prezantimi, foli për klankosova.tv foli artisti Shkupolli i cili tha se në këtë vepër, pati teknikë me të cilën s’është punuar deri më sot. ''Kryesisht janë tri teknika të ndryshme të paraqitura në këtë ekspozitë: Relievi në bakër që unë e punoj. Piktura me ndryshk, një teknikë që s'është punuar deri sot, do të thotë diçka risi, e punuar nga Ilirjana Luzha, si dhe skulpturën e punuar nga Flutra Hyseni, me qeramikë, terakotë dhe poliester". Ekspozita sipas tij, përcjell tri cikle. ''Cikli i punimeve të mia janë monedhat ilire, monedha të cilat më interesojnë dhe duhet të mburremi me to dhe lashtësinë tonë. Punimet e Ilirjana Luzhës, qe prezantojnë 'urbanizmin në lashtësi’, ku forma e të pikturarit është  nga perspektiva e lartë prej qiellit, pra se si duket toka dhe ambienti nga hapësira, ku e veçanta e tyre është ngjyra e hekurit (e kafta), që transmeton vjetërsinë, ku njëjtë edhe tek skulptura, Flutra ka futur po ashtu ngjyrën e ndryshkut''. Ndërkaq, sa i takon pjesëmarrjes së vizitorëve, Shkupolli u shpreh i kënaqur për interesimin e qytetarëve. Ai tutje shtoi se Prishtina ka nevojë për të tilla ngjarje, teksa ceki se iniciativa për hapjen e saj ka qenë e tij në bashkëpunim me tri artistët, e që përveçse nga shoqëria, nuk është përkrahur nga askush tjetër. Njëri nga vizitorët e rastit të ekspozitës, Qerkin Ibishi, ish-gazetar i ‘Rilindjes’ dhe ‘Bujkut’, tha se Shkupolli është mjeshtër i fortë i teknikës me bakër. ''Veprat e tij [Sali Shkupolli] kanë simbolikë, e sidomos shquhet për punimin e monedhave ilire, që janë shumë interesante me i pa njerëzit se në atë kohë çfarë monedha ka pasur, mandej edhe me emra të atyre mbretërve të asaj kohe. Edhe kolegët e tij që kanë punuar me ndryshkë në pëlhurë, kanë sjellë së bashku një ekspozitë interesante'', tha ai. Kjo ekspozitë qe e hapur për vizitorët këtë të mërkure, vetëm deri në orën 20:00.