“E zemëruar dhe e zhgënjyer”: Kamala Harris kritike ndaj Joe Bidenit në librin e saj të ri

Kamala Harris ka zbuluar se ishte “e zemëruar dhe e zhgënjyer” kur Joe Biden e telefonoi disa orë para debatit të saj presidencial me Donald Trumpin, për t’i sugjeruar se disa bashkëpunëtorë të fuqishëm të vëllait të Bidenit refuzonin ta mbështesnin. Ish-nënpresidentja dhe kandidatja demokrate e rrëfen këtë episod, si dhe kritika të tjera ndaj Bidenit, në kujtimet e saj të fushatës “107 Days”, të siguruara nga “The Guardian” përpara se libri të botohet javën e ardhshme. Harris shkruan se në shtator ndodhej në një dhomë hoteli në Filadelfia, e përgatitur për t’u përballur me Trumpin në një debat potencialisht vendimtar, kur presidenti i atëhershëm e telefonoi për t’i uruar fat – dhe për ta pyetur nëse do të kthehej sërish në Filadelfia para zgjedhjeve. Harris u habit pse Bideni do ta bënte një pyetje të tillë pa lidhje. Sipas librit, ai i kishte thënë: “Më telefonoi vëllai. Ka qenë duke folur me një grup njerëzish me ndikim të madh në Filadelfia”. Ai përmendi disa emra dhe e pyeti nëse Harris i njihte. Ajo nuk i njihte. Harris shkruan: “Pastaj arriti tek qëllimi i tij. Vëllai i kishte thënë se ata njerëz nuk do të më mbështesnin, sepse kisha thënë gjëra të këqija për të. Ai pretendoi se nuk ishte i prirur ta besonte, por mendoi se duhej ta dija, në rast se ekipi im më kishte nxitur të krijoja distancë mes nesh”. Nënpresidentja e atëhershme i kërkoi Bidenit që ta vinte në kontakt direkt me atë grup. Por telefonata nuk mbaroi aty. Ai u përpoq të rishkruante historinë e performancës së tij katastrofike në debatin me Trump tre muaj më herët. “Joe nisi të fliste pa fund për debatet e tij të mëparshme. ‘E munda atë herën tjetër; nuk isha mirë me shëndet në të fundit’. Vazhdonte të këmbëngulte se debati i tij nuk e kishte dëmtuar shumë me elektoratin. Unë fare pak po e dëgjoja”. Harris më pas reflekton se debati i saj me Trumpit do të ishte si “një dyluftim i madh”, me pasoja të mëdha për Amerikën dhe botën, dhe se duhej të ishte në formën më të mirë. Ajo shkruan për Bidenin: “Nuk mund ta kuptoja pse do të më telefononte, pikërisht atëherë, dhe ta kthente gjithçka tek vetja. Më shpërqendronte duke më futur merak për njerëz të fuqishëm armiqësorë në qytetin më të madh të shtetit më të rëndësishëm”. Bashkëshorti i saj, Doug Emhoff, “e kuptoi sa e zemëruar dhe e zhgënjyer isha. ‘Lëre’, më tha. Ai e dinte se duhej ta riorientoja vëmendjen. ‘Mos u shqetëso për të. Ti po merresh me Trumpin. Lëre’”. Gjatë fushatës dhe pas saj, Harris kishte shmangur kritikat ndaj presidentit me të cilin kishte shërbyer dhe e kishte mbrojtur atë mes pyetjeve për gjendjen e tij mendore. Por në “107 Days”, ajo nxjerr në pah tensionet mes tyre. Kur gjykata e lartë rrëzoi vendimin Roe v Wade mbi abortin në vitin 2022, për shembull, “Joe pati vështirësi të fliste për të drejtat riprodhuese në një mënyrë që i përgjigjej seriozitetit të momentit”. Harris pranon se kishte një dallim mes aftësisë së Bidenit për të qeverisur dhe për të bërë fushatë, dhe se ishte e shqetësuar për këtë të fundit. “Zëri i tij nuk ishte më i fuqishëm, gabimet verbale më të shpeshta”, shkruan ajo. Një takim i sikletshëm ndodhi më 4 korrik, kur Biden po përballej me thirrje në rritje për të hequr dorë pas një performance të dobët në debat. Harris e përqafoi dhe vëren se “ai dukej kaq i brishtë”, ndërsa Emhoff u orientua për të takuar zonjën e parë të asaj kohe, Jill Biden. Harris tregon: “Ajo dukej e tensionuar, madje e zemëruar. ‘Çfarë po ndodh?’ kërkoi ajo. ‘Na mbështesni?’ Sigurisht, tha Doug. Sigurisht që po ju mbështesim. ‘Në rregull. Kjo është shumë e rëndësishme. Duhet ta dimë këtë’”. “Kur iu bashkova, Doug kishte një shprehje të zymtë. Doug zakonisht është i ftohtë. I ngadalshëm për t’u zemëruar. Por e kuptova që diçka e kishte prekur”. “Më vonë shpërtheu. ‘Të fshehin për katër vjet, të japin punë të pamundura e të ndyra, nuk e korrigjojnë të vërtetën kur ato detyra keqkarakterizohen, nuk reagojnë kurrë kur sulmohesh, nuk lavdërojnë kurrë arritjet e tua, dhe tani, më në fund, duan të jesh atje në ballkon, duke qëndruar pikërisht përkrah tyre. Tani, më në fund, e dinë se je një aset, dhe kanë nevojë për ty që të qetësosh popullin amerikan”. “Dhe prapë, duhet të pyesin nëse jemi besnikë?” Harris kishte ndjerë zhgënjime të ngjashme, duke kujtuar se dikur ishte qortuar nga ekipi i Bidenit thjesht pse kishte mbajtur një fjalim shumë të mirë. “Mendimi i tyre ishte o krejt o hiç: nëse ajo shkëlqen, ai zbehet”. Biden u dorëzua përballë të pashmangshmes dhe u tërhoq nga gara elektorale më 21 korrik, duke e mbështetur më pas Harrisin. Këshilltarët e fushatës e shtynë atë të distancohej nga presidenti. David Plouffe, një këshilltar i lartë, më në fund i tha: “Njerëzit e urrejnë Joe Bidenin”. Harris pranon: “Më ishte e vështirë ta dëgjoja këtë”. Ajo kishte vetëm pak më shumë se tre muaj për të luftuar Trumpin dhe ushtrinë e tij të influencuesve të djathtë. Në fund të korrikut, kandidati republikan pretendoi në mënyrë të rreme se Harris, nëna e së cilës ishte indiane dhe babai xhamajkan, “rastësisht u bë e zezë” para disa vitesh, një deklaratë që shpërtheu në media. Harris i tha këshilltarit të fushatës Brian Fallon se nuk do t’i binte në grackë Trumpit. Ajo shkruan në libër: “‘Sot ai do që unë të dëshmoj racën time. Çfarë më pas? Do të thotë që s’jam grua dhe do të më duhet të tregoj vaginën time?’” “Brian, në anën tjetër të telefonit, heshti. E imagjinova fytyrën e tij që skuqej deri në një të kuqe të thellë”. /Klankosova.tv