Dyshja ukrainase e Eurovizionit nis mbledhjen e fondeve për foshnjat e parakohshme të luftës

Tvorchi, dyshja që përfaqëson Ukrainën në Eurovizionin e këtij viti, ka nisur një mbledhje fondesh për të ndihmuar foshnjat ukrainase të lindura para kohe për shkak të stresit të luftës. Mbledhja e fondeve është në partneritet me Visa dhe United24, një platformë zyrtare për mbledhjen e fondeve e nisur nga Presidenti ukrainas Volodymyr Zelensky, shkruan CNN, transmeton Klan Kosova. Sipas United24, “për shkak të luftës, numri i të porsalindurve të tillë është rritur me të paktën 15 për qind dhe ka mijëra fëmijë që kanë lindur para kohe dhe nuk mund të mbijetojnë pa ndihmë të veçantë”. Gjatë ceremonisë së hapjes së Eurovizionit të dielën në qytetin anglez Liverpool, dyshja kishin veshur kostume me emrat dhe peshat e foshnjave ukrainase të lindura para kohe. “Sofje, 1340 gram. Marichka, 804,6 gram. Nikita, 1280 gram. Alice, 1600 gram. Denis, 900 gram...Këta emra dhe pesha janë shfaqur në kostumet tona, që kemi veshur në pistën e bruztë të Eurovizionit”, kanë thënë ata në një postim në Instagram të hënën. Qëllimi i nismës është të tërheqë mbështetje ndërkombëtare për të mbledhur afro 270 mijë dollarë për të blerë 10 inkubatorë për foshnjat ukrainase. Eurovizioni tradicionalisht organizohet nga vendi i kampionit në fuqi. Ukraina fitoi konkursin në vitin 2022, por nuk mund ta presë atë për shkak të konfliktit të vazhdueshëm. Tema e Eurovision 2023 është “United by music” me gjysmëfinalet e para që do të nisin më 9 maj. *Klikoni KËTU për t’u bërë pjesë e kanalit zyrtar të Klan Kosovës në Viber. *Klikoni KËTU për ta shkarkuar aplikacionin e Klan Kosovës në Android, dhe KËTU për iOS.

klankosova.tv