Lajmet e fundit
Rreth 60 mijë emigrantë kanë hyrë në enklavën spanjolle të Ceutës nga Maroku brenda vetëm 24 orëve të fundit, duke shkaktuar një nga krizat më të mëdha kufitare të viteve të fundit.
Sipas BBC, të paktën 43 persona kanë humbur jetën gjatë përpjekjes për ta kaluar kufirin, transmeton Klankosova.tv.
Fluksi i madh i emigrantëve vjen vetëm pak ditë pasi Gjykata Supreme e Spanjës vendosi se emigrantët që ndalohen në det gjatë përpjekjes për të arritur në Ceuta ose Melilla nuk mund të kthehen menjëherë në Marok.
Autoritetet spanjolle njoftuan se deri më tani mbi 25 mijë emigrantë janë kthyer vullnetarisht, nërsa zyrtarët lokalë kanë kërkuar ndihmë nga Madridi për shkak të rritjes së tentativave për kalim të kufirit, por të enjten situata doli jashtë kontrollit, transmeton Klankosova.tv.
Presidenti i Ceutës, Juan Jesus Vivas, tha se gjendja është “e paqëndrueshme”, duke theksuar se numri i emigrantëve të ardhur përfaqëson rreth 70 për qind të popullsisë së qytetit, e cila numëron afërsisht 83.600 banorë.
Nga ana tjetër, Ministria e Brendshme e Spanjës vlerëson se numri i emigrantëve që kanë mbërritur është rreth 50 mijë, ndërsa njoftoi se ritmi i largimit nga Ceuta drejt Marokut ka arritur në rreth 150 persona në minutë.
Në anën tjetër, presidentja e Komisionit Evropian, Ursula von der Leyen, deklaroi se pamjet nga Ceuta janë “të papranueshme” dhe se situata duhet të ndalet menjëherë.
Ceuta dhe Melilla janë dy enklava spanjolle në Afrikën Veriore dhe përbëjnë të vetmet kufij tokësorë të Bashkimit Evropian me kontinentin afrikan.
Për dekada me radhë ato kanë qenë pika kryesore të emigracionit drejt Evropës dhe burim tensionesh diplomatike mes Spanjës dhe Marokut.
