Drogë dhe vjedhje, arrestohen dy shqiptarë në Gjermani, pritet ekstradimi i tyre

Policia e Shqipërisë ka bërë të ditur se në bashkëpunim me partnerët gjermanë, ka finalizuar me sukses operacionin policor të koduar “Exchange 2”. Ky operacion ka çuar në arrestimin e dy shtetasve shqiptarë, njëri prej të cilëve akuzohet për shitje të kokainës në Pogradec dhe tjetri për vjedhje në Paskuqan. Si rezultat i shkëmbimit të informacionit përmes Interpol Tiranë dhe Interpol Wiesbaden, autoritetet gjermane kanë arrestuar një 44-vjeçar dhe një 20-vjeçar. Dy të arrestuarit pritet të ekstradohen në Shqipëri, raporton Euronews.al. 44-vjeçari ishte dënuar në vitin 2022 nga Gjykata e Korçës me masën e sigurisë “Arrest në burg” për “Prodhim dhe shitje të narkotikëve”, ku dyshohet se ka shitur kokainë në mënyrë të përsëritur në lokalin e tij në Pogradec. Ndërkaq, 20-vjeçar ishte dënuar në vitin 2024 nga Gjykata e Tiranës me 6 muaj burgim për vjedhje.