Drejtor në spitalin publik, aksionar në atë privat (VIDEO)

Urologu Ardian Jusufi detyrën si U.D. i drejtorit të Spitalit Rajonal të Gjakovës "Isa Grezda" e mori të hënën. Në fakt, në këtë pozitë i njëjti kishte qenë edhe para dhjetë vjetësh, madje edhe atëherë si ushtrues detyre. Drejtori Jusufi, i sapoemëruar nga menaxhmenti i SHSKUK-së, ka vërejtur mungesë të madhe të stafit shëndetësor dhe se kjo mund të çojë deri në mbylljen e disa reparteve, si ai i infektivës, pulmologjisë, ORL-së e të tjerë. Derisa i njëjti shton se nëse nuk ka përkrahje nga menaxhmenti i SHSKUK-së dhe nga ministria përkatëse për ta përmirësuar gjendjen, këtë detyrë mund ta lërë, edhe pse e synon këtë post përmes konkursit të rregullt në të ardhmen. Pos këtyre, Jusufi u zotua edhe për diçka tjetër, ngase i njëjti është edhe aksionar i një spitali privat në këtë regjion. Ai bëri me dije se të gjitha shërbimet urologjike realizohen në spitalin e Gjakovës dhe se për këto vite asnjëherë askënd nuk e ka referuar dhe nuk do ta bëjë një gjë të tillë. Në lidhje me çështjen se a paraqet kjo konflikt interesi, Klan Kosova i është adresuar edhe Agjencisë Antikorrupsion, të cilët bënë me dije se do ta shqyrtojnë. Ndërkaq, nga SHSKUK-ja në lidhje me këtë nuk kanë kthyer përgjigje. https://www.youtube.com/watch?v=49YnPxs_8kw