Drama për presidentin: Kushtetuesja deklarohet për Klanin, kur merret vendimi ndaj kërkesës së Haxhiut?

Gjykata Kushtetuese e Republikës së Kosovës është deklaruar për Klan Kosova, për kërkesën e kryeparlamentares Albulena Haxhiu, që të pezullohen afatet kushtetuese në mënyrë që presidenti i vendit të zgjidhet brenda 60 ditësh. Në një përgjigje për gazetaren Qëndresa Bellagoshi, ky institucion bëri të ditur se vendimi do të merret pasi të shqyrtohet secili aspekt kushtetues i pretendimeve mbi të cilat kryetarja e Kuvendit ka bërë kërkesë. “Kërkesa për vlerësimin e kushtetutshmërisë së procedurës për zgjedhjen e Presidentit të Republikës së Kosovës dhe vendosjen e masës së përkohshme, është parashtruar në mënyrë elektronike, më 5 mars 2026. Vendimi do të merret pasi që të shqyrtohen të gjitha aspektet kushtetuese të pretendimeve të bëra në kërkesë nga pala parashtruese, në përputhje me Kushtetutën, Ligjin për Gjykatën Kushtetuese dhe Rregulloren e punës së Gjykatës.” – thuhet në përgjigje, transmeton Klankosova.tv Ndryshe, presidentja Vjosa Osmani ka nxjerrë dekretin për shpërndarjen e Parlamentit, pasi në afatin e fundit që ishte mbrëmë, dështoi zgjedhja e kryetarit të shtetit. Pas përfundimit të seancës, Haxhiu njoftoi se ka parashtruar kërkesën në Kushtetuese, ndërsa sot, Osamni tha se Kushtetuta është e qartë: procedurat për zgjedhjen e presidentit mund të nisin 60 ditë para afatit të fundit, por procesi duhet të finalizohet jo më vonë se 30 ditë para përfundimit të mandatit aktual. /Klankosova.tv