Dorëzohet në polici Fazli Ndrecaj, i kërkuar për 500kg drogë

Është dorëzuar në polici në stacionin policor të Suharekës i dyshuari Fazli Ndrecaj, i cili deri më tani ka qenë në kërkim. Lajmin për Klankosova.tv e ka bërë të ditur zëdhënësi i Policisë për Rajonin e Prizrenit, Shaqir Bytyqi. Ai bëri të ditur se i dyshuari është dorëzuar në stacion i shoqëruar nga avokati i tij sot rreth orës 19:30. “I njëjti dyshohet për vepra penale që lidhen me shitjen dhe posedimin e lëndëve narkotike. Menjëherë është njoftuar Njësia e Hetimit të Trafikimit me Narkotikë, e cila, në konsultim me prokurorin, do të vazhdojë me procedurat e mëtejshme ligjore”, njoftoi Bytyqi. Fazli Ndrecaj ishte në arrati që nga 7 tetori i vitit të kaluar. I njëjti është i dyshuar në rastin e 500 kilogramëve narkotikë, konkretisht veprat penale “kultivimin e bimëve narkotike, blerjen, posedimin dhe shitjen e paautorizuar të substancave psikotrope”, si dhe “mbajtjen e paautorizuar të armëve”. /Klankosova.tv https://klankosova.tv/i-kerkuar-per-droge-dyshohet-se-leviz-i-armatosur-policia-po-punon-intensivisht-per-ta-kapur-fazli-nrecajn33/