DokuFest nuk zhvendoset nga Prizreni, Bashkia Tiranë është sponsor zyrtar

Drejtori i festivalit “DokuFest”, Veton Nurkollari, sqaroi se ky festival nuk e ka as edhe një plan të vetëm që të zhvendoset nga Prizreni. Zërat për këtë nisën kur Erion Veliaj njoftoi sot, me anë të një postimi në Twitter, se Bashkia e Tiranës do të jetë sponsor zyrtar i DokuFestit për këtë vit. E ky lajm vjen pak orë pasi u bë e ditur se festivali Sunny Hill u zhvendos nga Prishtina në Tiranë. “Është vetëm një njohje dhe mbështetje nga ana e Bashkisë së Tiranës, e cila shpresoj që do të konkretizohet në ditët e ardhshme, se është ende në suaza të zotimit nga Veliaj. Jemi ne bisedim e sipër”. “Nuk bëhet fjalë për zhvendosje të festivalit në Tiranë, as me sponsorizim gjeneral e asgjë të ngjashme. S’kemi pasur asnjëherë ndonjë ide të tillë", tha ai. Nurkollari bëri të ditur po ashtu se para 10 vjetësh ndoshta ka pasur oferta e mundësi për zhvendosje të festivalit, por siç theksoi, asnjëherë s’e kanë shqyrtuar seriozisht sepse DokuFest është i qytetit të Prizrenit dhe se aty do vazhdojë të mbetet.