Dogana sekuestron 237 mijë pako të paligjshme të cigareve, dëmi potencial fiskal 340,000 euro

Dogana e Kosovës, përmes Zyrës Doganore në Prishtinë, ka realizuar një kontroll të detajuar doganor ndaj një dërgese të ardhur nga Turqia. Gjatë këtij kontrolli, sipas njoftimit për media, zyrtarët doganorë kanë zbuluar dhe sekuestruar gjithsej 237,000 copë/pako për ambalazhim të 20 cigareve, të cilat mbanin mbishkrimin “DRINA”. “Malli nuk ishte i deklaruar në përputhje me legjislacionin doganor në fuqi dhe dyshohet se kishte për qëllim përdorimin për prodhim ose paketim të produkteve të duhanit në kundërshtim me dispozitat ligjore, me ç’rast efekti në parandalim nga humbjet potenciale fiskale është rreth 340,000 euro”, ka njoftuar Dogana. Sipas Doganës, janë ndërmarrë menjëherë veprimet procedurale përkatëse, përfshirë sekuestrimin e mallit dhe inicimin e procedurave administrative kundërvajtëse dhe hetimore, në bashkëpunim me institucionet kompetente. /Klankosova.tv