Dogana mbledh 500 milionë euro, 78 milionë më shumë se vitin e kaluar

Dogana e Kosovës ka bërë të ditur se deri më tani kanë arritur të tejkalojnë të hyra prej 500 milionë eurove. Bëhet e ditur se kjo arritje paraqet një rritje të madhe prej 78 milionë euro, ose mbi 18 për qind, krahasuar me mbledhjen e të hyrave të vitit të kaluar. “Këto të hyra janë mbledhur edhe pse efekti në lirimet e taksave sipas vendimeve të Qeverisë për importin për prodhuesit dhe thellimi i lirimeve nga marrëveshjet e tregtisë së lirë janë thelluar dukshëm. Në këtë periudhë janë liruar 79 milion euro taksa të kësaj kategorie apo 21 milion më shumë se viti paraprak”. “Ngjashëm, bazuar në vendimin e Qeverisë, është bërë progres i rëndësishëm në lehtësimin e tregtisë, veçanërisht me funksionimin efikas të zhdoganimit në portin e Durrësit dhe terminaleve të operuara nga shteti. Ky progres ka rezultuar në një kursim të konsiderueshëm të kostos prej 4.3 milionë euro gjatë periudhës tre mujore, ndërsa që sipas trendit të progresit, ne parashikojmë që ky kursim të përshkallëzohet, duke arritur deri në 20 milionë euro deri në fund të vitit”, thuhet në njoftimin e doganës, transmeton Klankosova.tv. Tutje, Dogana tha se mbetet e përkushtuar për të nxitur një mjedis të favorshëm për eksportin, tregtinë dhe gjenerimin e të ardhurave, duke kontribuar në prosperitetin dhe zhvillimin e vendit.