Digjet ndërtesa në pronësi të kandidatit të Listës Serbe për kryetar të Zubin Potokut

Një ndërtesë është përfshirë nga zjarri në orët e para të ditës së sotme. Ngjarja ka ndodhur në Uglare të Zubin Potokut. Kjo është konfirmuar për Klankosova.tv nga zëvendësdrejtori i Policisë për veriun Veton Elshani. "Sot rreth orës 4:30 morëm informacion se zjarrfikësit po reagonin ndaj një zjarri që ndodhi në Uglare. Shtëpia, kati i parë i së cilës u dogj, ka shërbyer si shtypshkronjë e cila në këtë kohë nuk ishte funksionale. Nuk pati asnjë të lënduar, por u shkaktuan dëme materiale", tha ai. Elshani tha se kemi të bëjmë me një zjarr të qëllimshëm. Ai theksoi se rasti po hetohet si "Shkaktim i rrezikut të përgjithshëm". "Nuk ka të dyshuar, ndërsa Policia është duke u marr me rastin i cili trajtohet si zjarrëvënie, shkaktim i rrezikut të përgjithshëm", theksoi Elshani për Klankosova.tv. Klankosova.tv mëson se objekti është në pronësi të kandidatit të Listës Serbe për kryetar të Zubin Potokut, Millosh Peroviq.