“Devolli Corporation” rrëmben edhe tri çmime nga OEK-u

Oda Ekonomike të Kosovës ka bërë ndarjen e çmimeve vjetore për vitin 2022 në tri kategori për kompanitë vendore, atë të tatimpaguesit, eksportuesit dhe punëdhënësit. Ashtu sikur në dy vjetët e kaluara edhe kësaj radhe "Devolli Corporation" ka përmbushur kriteret dhe është shpërblyer me tri çmime atë të tatimpaguesit, eksportuesit dhe punëdhënësit të këtij viti, njofton Klan Kosova. Në ceremoninë e mbajtur në ambientet e Klan Arenës, drejtori i Odës Ekonomike të Kosovës, Lulëzim Rafuna, shprehu falënderime të veçanta për të gjithë kontribuuesit për gjashtë dekada që mbushi mbrëmë ky institucion. Ai tutje shtoi se është mirënjohës ndaj kompanive të suksesshme të Kosovës të cilat i quajti bartës të zhvillimit ekonomik të Kosovës së pasluftës. Nga “Devolli Corporation ShPK”, u shprehen të lumtur që edhe këtë vit kompania ka realizuar suksese të radhës dhe që plani zhvillimor i kësaj korporate e cila numëron mbi 4,500 të punësuar dhe një rrjet prej më tepër sa 15,000 bashkëpunëtorë të jashtëm, është kontinuitet i plasmanit të brendeve në mbarë tregun botërorë. "Devolli Corporation" mban statusin e korporatës lidere në Kosovë.