Dëshmitari britanik: Familja Jashari kishte ndikim të madh

John Stewart Duncan, ish-këshilltari i gjeneralit Wesley Clarck, po vazhdon dëshminë e tij në Hagë. Ai thotë se këshillat që ai i jepte gjeneralit Clark, burimet i kishte të larmishme. “Informoja gjeneralin Clark në mëngjes. Zgjohesha, kam hyrë në internet për të parë zhvillimet e fundit se çfarë po ndodhte në Kosovë, dëgjoja lajmet e 24 orëve të fundit, në veturë dëgjoja edhe BBC-në,  lexoja të gjitha shërbimet. Përmes videolidhjeve informonim komandantët në terren”, thotë ai për punën që bënte gjatë kohës së luftës në Kosovë, transmeton Klankosova.tv. Tutje, Duncan thotë se përpiqej të krijonte një panoramë se çfarë kishte ndodhur çdo 24 orë në Kosovë. Ish-diplomati nuk iu përgjigj pyetjes nëse kishte si burim, persona të brendshëm. Ndër të tjera ai shton se kultura shqiptare e ka ndihmuar ta kuptonte Ushtrinë Çlirimtare të Kosovës. Duncan e përmendi edhe familjen herorike Jashari, për të cilët tha se kishte ndikim të madh gjatë vitit 1998. “Kur bëja hulumtime, dilte emri i Jasharajve çdo kund. Kishin rëndësi të madhe”, tha ai.