Dënime deri në 10 vjet burg për vjedhje sekretesh të TSMC-së në Tajvan

Një gjykatë në Tajvan ka shqiptuar dënime me burg deri në 10 vjet për pesë persona të përfshirë në një rast të profilit të lartë për vjedhje të sekreteve tregtare që lidhen me gjigantin e prodhimit të çipave, TSMC. Sipas vendimit, njësia lokale e kompanisë japoneze Tokyo Electron është gjobitur me 5 milionë dollarë, ndërsa të pandehurit janë dënuar me burgime që variojnë nga 10 muaj deri në 10 vjet. Rasti konsiderohet një ndër më të rëndësishmit në Tajvan, pasi lidhet me teknologjitë kyçe të industrisë së gjysmëpërçuesve dhe përfshin akuza sipas Ligjit për Sigurinë Kombëtare. Prokuroria kishte ngritur aktakuzë në gusht të vitit 2025 ndaj Chen Li-ming, ish-punonjës i TSMC-së dhe Tokyo Electron, nën dyshimet për përvetësim të paligjshëm të sekreteve tregtare. Sipas autoriteteve, ai dhe të pandehur të tjerë kishin synuar të ndihmonin Tokyo Electron të siguronte më shumë kontrata për pajisje nga TSMC. Gjykata e dënoi Chen me 10 vjet burgim. Ndërkohë, tre ish-punonjës të tjerë të kompanisë më të madhe në botë për prodhimin me kontratë të çipave të avancuar për inteligjencë artificiale u dënuan me nga dy deri në gjashtë vjet burg./Klankosova.tv