David Bowie vallëzon sërish

Kult artisti David Bowie këtë vit do ta ripublikojë hitin e tij të vitit 1983, Let’s Dance, në një tirazh të kufizuar, në pllakë gramafoni të verdhë 7 inçëshe. Disku me dy versione – atë të studios dhe incizimin nga performansa në Vancouver, në 1983 – do të shfaqet me rastin e hapjes së ekspozitës David Bowie is, në Melbourne, transmeton Klan Kosova. Të dyja këngët janë remasterizuar në mënyrë të veçantë, kurse tirazhi do të jetë i kufizuar në 550 ekzemplarë, që do të shiten vetëm në galerinë e Australian Centre for the Moving Image, shkruan New Musical Express. Për koincidencë, video spoti i kësaj kënge ishte realizuar në Australi. Më 24 korrik, Bowie do ta publikojë përsëri edhe këngën Fame, me rastin e 40 vjetorit të saj, transmeton Klan Kosova. Kjo këngë ishte pjesë e albumit Young Americans, që doli në treg më 25 korrik 1975. Artisti i madh është duke punuar në mjuzikllin Lazarus, i cili do të bazohet në filmin e tij The Man Who Fell to Earth, ku ai e luan rolin e jashtëtokësorit Thomas Jerome Newton.

klankosova.tv