Çka nëse sulmohet Kosova? Përgjigjen ministrat e mbrojtjes të Shqipërisë dhe Kroacisë

Ministri i Mbrojtjes i Shqipërisë, Ermal Nufi, gjatë qëndrimit të tij në një vizitë zyrtare në Kroaci, ka takuar homologun e tij kroat, Ivan Anushiq. Dyshja mbajtën një konferencë të përbashkët për media gjatë ditës së djeshme, teksa u pyetën se si do të silleshin Shqipëria dhe Kroacia, duke pasur parasysh deklaratën e nënshkruar për bashkëpunim ushtarak mes tre shteteve, në rast të ndonjë sulmi ndaj Kosovës. Ministri shqiptar dha një përgjigje interesante për këtë çështje, duke thënë se si anëtar i NATO-s, do të harmonizonte çdo veprim me Aleancën, mirëpo shtoi se si shtet do të vepronin ndryshe. “Shqipëria dhe Kroacia janë të harmonizuara me NATO-n dhe çdo veprim që do të ndërmarrin, do të jetë në përputhje me NATO-n. Por kjo nuk do të thotë që ne si shtet nuk do të ndërmarrim asgjë në mbrojtje të Kosovës. Deklarata mes Kroacisë, Kosovës dhe Shqipërisë është nënshkruar me vullnetin e popujve shqiptar dhe kroat. Natyrisht, Kosova synon të integrohet në BE, në NATO dhe në të gjitha instrumentet e sigurisë, prandaj nuk shihet asnjë rrezik”. “Si Kroacia ashtu edhe Shqipëria konsiderojnë se siguria në këtë rajon është në interes të përbashkët të të gjitha shteteve në rajon”, deklaroi ministri i Mbrojtjes i Shqipërisë, Ermal Nufi, ka raportuar media kroate, "Vecernji List", transmeton Klankosova.tv. Ndërkaq, homologu i tij kroat, Ivan Anushiq, për çështjen e njëjtë, theksoi se deklarata e nënshkruar mes tri vendeve nuk paraqet aleancë ushtarake. “Kjo deklaratë nuk përfshin asnjë aleancë ushtarake. Është një deklaratë bashkëpunimi, jo një aleancë ushtarake”, tha ai, teksa shtoi: “Ju kujtoj se që nga viti 2010 ekziston një marrëveshje shumë më e gjerë, më përmbajtjesore dhe më e detajuar pikërisht me Serbinë, të cilën Serbia e hesht. Ne e kemi atë marrëveshje dhe është në fuqi që nga viti 2010. Deklarata që kemi nënshkruar nuk përfshin asnjë aleancë ushtarake, as aktivitete luftarake apo të luftës. Kjo deklaratë është ekskluzivisht në nivel të bashkëpunimit teknik, shkëmbimit të njohurive dhe përvojave, dhe kjo është ajo që ne bëjmë”, tha Anushiq. Ndaj marrëveshjes trepalëshe për bashkëpunim në fushën e mbrojtjes, ka reaguar ashpër vazhdimisht Serbia, duke e quajtur këtë si një "aleancë kundër Serbisë". Këtë e kanë mohuar në vazhdimësi palët. /Klankosova.tv