Çfarë tha Milot Rashica pasi shënoi golin e parë të sezonit?

Milot Rashica shënoi dje golin e tij të parë sezonal në barazimin 1-1 të Beshiktashit si mysafir i Lausanne. Kështu ai ishte edhe i përzgjedhuri i mediave turke që kishin udhëtuar drejt Zvicrës për të dhënë intervistë pas mbarimit të ndeshjes. Miloti gjatë 90 minutave ndryshoi në disa raste pozicionin në fushë, duke u alternuar me dy mesfushorët e tjerë ofenzivë, Joao Mario dhe Rafa Silva, teksa tha se kjo nuk ishte problem për të. "Nuk ishte e vështirë të luaja në pozita të ndryshme, pasi ne patëm posedimin në shumicën e kohës, vrapimet shpesh herë i patëm me topin në këmbë" - tha ai. I pyetur për ndeshjen, futbollisti ishte i bindur se skuadra luajti mirë dhe duhet të kishte shënuar më shumë gola, por gabimet iu kushtuan me barazim. "Nisëm ndeshjen mirë, mbajtëm topin në posedim në shumicën e kohës dhe ata kishin raste vetëm kur ne bënim gabime. Mendoj se ne u mbrojtëm mirë, shënuam gol, patëm disa shanca dhe mendoj se kemi mundur të shënojmë edhe një ose dy gola më shumë dhe ta fitonim herët këtë ndeshje. Duhet të punojmë në ndërprerje ku pësuam përsëri, kemi dhe një ndeshje në shtëpi dhe duhet ta përfundojmë punën atje" - Përfundoi Rashica. Beshiktashi luan ndeshjen e kthimit ndaj Lausanne të enjtën e ardhshme dhe në rast të fitores do të kualifikohej në Conference League./Klankosova.tv