Bytyqi: Serbia në prag të luftës civile - rreziku i destabilizimit prek edhe Kosovën e Shqipërinë (VIDEO)

Eksperti i marrëdhënieve ndërkombëtare, Enver Bytyqi, ka deklaruar se situata aktuale në Serbi ka marrë përmasa të rënda dhe përbën një rrezik të madh jo vetëm për këtë shtet, por edhe për stabilitetin e gjithë rajonit, përfshirë Kosovën dhe Shqipërinë.

“Situatat që po zhvillohen në Serbi janë jashtëzakonisht serioze, madje kanë kaluar kufijtë e një konflikti normal. Po flasim për një vend që ndodhet në prag të një lufte civile".

"Presidenti i Serbisë, Alleksandar Vuçiq, ka vendosur përballë njëri-tjetrit mbështetësit e tij dhe protestuesit opozitarë, të cilët ndodhen në rrugë që nga nëntori i vitit të kaluar dhe situata po përkeqësohet çdo ditë",  theksoi Bytyqi, në emisionin "Kosova Today" në Klan Kosova.

Sipas tij, trazirat që po ndodhin në Serbi, të cilat po ndodhin në një kohë kur Beogradi kërkon rikthimin e sovranitetit mbi Kosovën ose së paku ndarjen e saj, janë zhvillime që duhen parë me kujdes të madh.

“Këto zhvillime kaotike, këto konflikte të brendshme, në një mënyrë apo tjetër, mund të ndikojnë drejtpërdrejt edhe në Kosovë dhe Shqipëri. Çdo luftë apo konflikt në rajon cenon interesat e gjithë vendeve të Ballkanit dhe stabilitetin e tyre", tha tutje ai.