BQK anëtarësohet në Organizatën Ndërkombëtare për Mbrojtje të Konsumatorëve Financiarë

Banka Qendrore e Kosovës (BQK) është anëtarësuar në Organizatën Ndërkombëtare për Mbrojtje të Konsumatorëve Financiarë (FinCoNet). BQK thotë se anëtarësimi në FinCoNet përfaqëson një hap të rëndësishëm drejt forcimit të rolit të këtij institucioni si autoritet mbikëqyrës në avancimin e kornizës për mbrojtjen e konsumatorit financiar, me theks të veçantë në mbikëqyrjen efektive të sjelljes së tregut të institucioneve financiare. “Përmes anëtarësimit në këtë organizatë, BQK do të përfitojë nga ekspertiza dhe praktikat më të mira ndërkombëtare në zhvillimin e mëtejmë të Departamentit për Mbrojtjen e Konsumatorit si një funksion i ri i shtuar me strukturën e re organizative. Kjo përfshin përforcimin e metodave të avancuara për monitorimin dhe analizimin e sjelljes së institucioneve financiare, si dhe përmirësimin e transparencës dhe mbikëqyrjes për mbrojtjen e konsumatorëve”, thuhet në njoftimin e BQK-së. BQK tha se në pajtim me Planin Strategjik mbetet e përkushtuar në avancimin e projekteve që promovojnë mbrojtjen e konsumatorit, gjithë përfshirjen financiare dhe rritjen e besimit të qytetarëve në tregun financiar, përmes forcimit të transparencës dhe qasjes së drejtë në shërbimet financiare. /Klankosova.tv