Bosnja firmos marrëveshje për tubacion gazi me Kroacinë

Bosnja dhe Hercegovina ka nënshkruar një marrëveshje me Kroacinë për ndërtimin e një tubacioni të ri gazi, me synimin për të reduktuar varësinë nga furnizimi rus dhe për të diversifikuar burimet energjetike. Marrëveshja u firmos në Dubrovnik nga kryeministrja Borjana Krišto dhe homologu i saj kroat Andrej Plenković. Projekti parashikon lidhjen e Bosnjës me terminalin e gazit natyror të lëngshëm (LNG) në ishullin Krk, duke i mundësuar akses në furnizime alternative, përfshirë gazin amerikan. Sipas autoriteteve boshnjake, tubacioni konsiderohet një hap i rëndësishëm drejt rritjes së sigurisë energjetike dhe uljes së varësisë nga Rusia, në një kohë kur Bashkimi Evropian po synon të kufizojë importet energjetike nga Moska, raporton a2cnn, transmeton Klankosova.tv. Megjithatë, Brukseli ka shprehur shqetësime për projektin. Zyrtarë të BE-së paralajmërojnë se marrëveshja mund të ndikojë negativisht në përpjekjet e Bosnjës për anëtarësim, duke përmendur mungesën e transparencës dhe procedurave konkurruese në përzgjedhjen e kompanive përfituese. Projekti, me një vlerë të vlerësuar rreth 1.5 miliardë dollarë, mbështetet nga kompania amerikane AAFS Infrastructure and Energy, e drejtuar nga persona me lidhje të mëparshme me rrethin e Donald Trump. Kjo ka nxitur kritika nga organizata si Transparency International, e cila paralajmëron për precedent të rrezikshëm në menaxhimin e projekteve publike. Autoritetet evropiane kanë theksuar se Bosnja, si vend kandidat, duhet të respektojë standardet e BE-së në sektorin energjetik dhe të konsultohet me institucionet evropiane për çdo ndryshim ligjor apo projekt strategjik. Projekti i tubacionit pritet të shoqërohet edhe me ndërtimin e termocentraleve me gaz, që synojnë uljen e prodhimit të energjisë nga qymyri dhe rritjen e qëndrueshmërisë së sektorit energjetik në vend.