Bitcoin prek rekord të ri, ndikon efekti FOMO

Vlera e Bitcoin kaloi sot 111,000 dollarë (98,000 euro) dhe arriti një nivel të ri historik për shkak të interesit të fortë të investitorëve institucionalë dhe pranisë në rritje të aktorëve financiarë tradicionalë në tregun e kriptomonedhave. Ndryshe nga ciklet e mëparshme, kjo rritje e bitcoin nuk nxitet nga entuziazmi i investitorëve të vegjël, por bazohet në hyrjen e qëndrueshme të kompanive dhe fondeve të mëdha në tregun e aseteve dixhitale, thonë analistët, transmeton klankosova.tv. Ndër trendet e reja, vërehet praktika e kompanive të pranishme në bursë për të përdorur bitcoin si një aktiv rezervë, duke financuar blerjen përmes tregut të kapitalit, raporton portali Coin Desk (CoinDesk). Një sinjal shumë i rëndësishëm vjen nga banka më e madhe amerikane, JP Morgan Chase, e cila thuhet se ka filluar t’u ofrojë klientëve qasje në Bitcoin. Analistët vlerësojnë se kjo është një pikë kthese për pranimin e kriptovalutave në financat tradicionale. Bitcoin tregon qëndrueshmëri të jashtëzakonshme dhe mund të rritet më tej për shkak të efektit FOMO (frika e humbjes së një mundësie) i cili mund të tërheqë investitorë të vegjël deri më tani joaktivë, përfundojnë ekspertët.