Biden paralajmëron: Mos e minoni marrëveshjen e armëpushimit të Gazës

Presidenti i ShBA-së, Joe Biden ka paralajmëruar të gjitha palët e përfshira në negociatat për një marrëveshje të mundshme të armëpushimit të Gazës që të mos minojnë përpjekjet.

Biden deklaroi se "ne jemi më afër se kurrë" për një armëpushim pas raundit të fundit të negociatave, por një zyrtar i lartë i Hamasit shprehu skepticizëm, raporton BBC, transmeton Klankosova.tv.

Presidenti njoftoi gjithashtu se po dërgonte Sekretarin e Shtetit, Antony Blinken në Izrael për të vazhduar "përpjekjet intensive për të përfunduar këtë marrëveshje".

Komentet e tij vijnë pas një deklarate të përbashkët nga ShBA-ja, Katari dhe Egjipti - duke deklaruar se ata kishin paraqitur një propozim për një armëpushim dhe marrëveshje për lirimin e pengjeve që "zvogëlon boshllëqet" midis Izraelit dhe Hamasit.