Lajmet e fundit
Kreu i Partisë Demokratike në Shqipëri, Sali Berisha, ka thënë se tenisonet në veri kanë si arkitekt kryesor presidentin e Serbisë, Alekasandër Vuçiqin.
Berisha i bëri thirrje BE-së dhe SHBA-së që të dënojnë skenarin destabilizues në veri, me anë të cilit sipas kryedemokratit, Vuçiç kërkon të dështojë pa filluar negociatat mbi propozimin e fundit franko-gjerman.
Berisha tha se ballkanizimi i diplomacisë ndërkombëtare nuk është zgjidhja.
“Të dashur miq, prej disa ditësh në veriun e Kosovës banda të armatosura serbe, por thuhet edhe mercenarësh të Wagner-it kanë bllokuar me barrikada rrugët, vendkalimet kufitare duke dhunuar haptas ligjin dhe rendin e një vendi të lirë dhe të pavarur. I gjithë ky skenar i rrezikshëm dhe destabilizues ka si arkitekt kryesor Aleksandër Vuçiç. Ky skenar realizohet në një kohë kur dy vendet kryesore të BE Franca dhe Gjermania, të mbështetura edhe nga SHBA kanë paraqitur një plan për një marrëveshje, me gjasa më të rëndësishmen deri sot, midis Kosovës dhe Serbisë. Askush përveç Beogradit dhe Kremlinit nuk mund të jetë të interesuar për zhvillime të tilla dhe nuk përfitojnë më shumë se ata prej tyre”, ka shkruar Berisha, transmeton Klankosova.tv.
“Por ajo që është e paprecedent është mos dënimi, madje edhe njëfarë justifikimi me heshtje i zhvillimeve në veriun e Kosovës nga faktori ndërkombëtar, përfshi këtu të deleguarit e BE dhe SHBA për bisedimet midis Kosovës dhe Serbisë. Po rikujtoj këtu heshtjen jo parimore ndaj sulmit me bomba kundër gazetarëve dhe ekipeve televizive të Prishtinës në Rudar, plagosjen e policit nga bandat e armatosura në veri etj”, deklaroi ai.
Berihsa tha se asnjë marrëveshje nuk mund të arrihet duke mbështetur aktet antiligjore të bandave të armatosura dhe veprimet e tyre kriminale që dhunojnë rendin dhe ligjin.
“Duke dënuar me forcën më të madhe veprimtarinë kriminale të bandave të armatosura serbe në veri të Kosovës të orkestruara nga serbomadhi Vuçiç dhe duke mbështetur fuqimisht të drejtën e qeverisë së Kosovës për vendosjen e integritetit teritorial në mbarë vendin, ju bëj thirrje Bashkimit Europian dhe SHBA të dënojnë skenarin destabilizues të Beogradit në veriun e Kosovës, me të cilin presidenti Vuçiç kërkon të dështojë pa filluar negociatat mbi propozimin e fundit Franko-Gjerman për marrëveshje midis dy vendeve. Sikundër i bëj thirrje KFOR-it të përmbush të gjithë detyrimet e tij për t’i dhënë fund kësaj situate të krijuar dhe orkestruar nga Beogradi”, shkroi ai.
“Së fundi shtoj se pavarësisht nga kërcënimet dhe përpjekjet e Beogratit për destabilizm, siguria e Kosovës është pa dyshim e garantuar nga NATO. Prandaj u bëj thirrje autoriteteve të Kosovës, të cilat në interes të vendosjes së dialogut, kanë dëshmuar fleksibilitet e përgjegjësi të lartë në qëndrimet e tyre, të vazhdojnë të japin të gjithë ndihmën e mundshme dhe të mos lejojnë qe spirali i dhunës të zëvendësojë dialogun dhe perspektivën e marrëveshjes së rëndësishme, jo vetëm për Kosovën, por edhe për rajonin tonë”.
