Berisha: Ndërhyrja e ambasadores Kim personale, do t'i informoj autoritetet në ShBA

Ish-kryeministri shqiptar, Sali Berisha, ka bërë me dije se do të informojë ShBA-në për, siç pretendon ai, ndërhyrjet në politikën e brendshme të ambasadores Yuri Kim. Ky reagim i Berishës vjen pasi një ditë më parë akuzoi ambasadoren amerikane se po ndërhyn në vendimmarrjen e gjykatave për çështjen e brendshme të PD-së.

Berisha u shpreh se kjo ndërhyrje është qëndrim personal i ambasadores dhe jo një orientim i vetë ShBA-së.

“Nuk besoj kurrë se ky është një orientim, një parim i vendit të saj të Lirisë. Ky është një akt individual për të cilin ne në mënyrë absolute do të informojmë me hollësi autoritetet e SHBA-së”, deklaroi ish-kryeministri. Berisha komentoi edhe vendimin e dhënë dje nga gjykatësja Blerina Muça që njohu ankimimin e bërë nga Enkelejd Alibeaj. “Një gjykatëse vendosi dje të shkruaj ligjin e shtetit, në një akt që tejkalon çdo imagjinatë, në një presion të tmerrshëm, ndaj të cilit një njeri që ka minimumin e karakterin nuk i lejon vetes akte të tilla. Është po kjo gjykatëse nuk ka pranuar ankesën tonë”, tha ai. Berisha bëri këtë deklaratë para gazetarëve këtë të shtunë pas votimit për zgjedhjen e kreut të PD-së në degën numër 2 në Tiranë, shkruan Euronews.al.