Bellaqa: Pavarësia e hapi Kosovën ekonomikisht

Ekonomisti Jakup Bellaqa vlerëson se pas shpalljes së pavarësisë, hap i madh pozitiv ka qenë anëtarësimi i Kosovës nëpër organizatat e mëdha ekonomike si Fondi Monetar Ndërkombëtar dhe Banka Botërore. Për të, 17 shkurti i 2008-ës, nuk ishte vetëm hapje politike për Kosovën. “Ka ndodhur edhe hapja ekonomike, sepse këto shkojnë bashkë. Pas shpalljes së pavarësisë ka pasur projekte të mëdha kapitale, si ‘Rruga e Kombit’”, është shprehur Bellaqa në emisionin e ekonomisë, Portofol në Klan Kosova FM. Nënshkrimi i Marrëveshjes së Stabilizim-Asociimit më 2016, sipas tij ka qenë e arritur tjetër e madhe. “Kosovës iu hapën dyert që prej një tregu të vogël, të kalojë në tregjet rajonale, ndonëse Serbia ka krijuar pengesa". Për Bellaqën, Kosova mund të ecë edhe më mirë sa i përket rritjes ekonomike, derisa një prej problemeve më të mëdha të saj përmend kontrabandën.