Belgjika planifikon të shtetëzojë centralet bërthamore

Qeveria belge ka thënë se po planifikon të blejë reaktorët e saj bërthamorë nga gjigandi francez i energjisë Engie, me qëllim sigurimin e furnizimit me energji të vendit. Kryeministri Bart De Wever tha se marrëveshja do të përfshinte "një marrje të plotë në kontroll" të flotës bërthamore, duke përfshirë shtatë reaktorët bërthamorë të vjetër të Belgjikës. Ky veprim do të nënkuptonte gjithashtu pezullimin e planeve për çmontimin e operacioneve bërthamore në Belgjikë, shkruan BBC, transmeton Klankosova.tv. “Kjo qeveri po zgjedh energji të sigurt, të përballueshme dhe të qëndrueshme, me më pak varësi nga importet e lëndëve djegëse fosile dhe më shumë kontroll mbi furnizimin tonë”, shkroi De Wever në X. Ky veprim do të përmbyste heqjen graduale të legjislacionit për energjinë bërthamore të miratuar në fillim të viteve 2000 për shkak të shqetësimeve për sigurinë që ndalonin ndërtimin e centraleve të reja bërthamore dhe kufizonin jetëgjatësinë e atyre ekzistuese në 40 vjet.