Behluli: Vuçiq po shqyrton dorëheqjen nga presidenti, por synon kandidimin për kryeministër

Gazetarja Ardita Behluli, në një lidhje direkte nga Presheva për emisionin “Kosova Today”, bëri të ditur se presidenti serb, Aleksandar Vuçiq, ka paralajmëruar se po shqyrton mundësinë e dorëheqjes nga posti i presidentit brenda tre deri në katër muajve të ardhshëm. Sipas saj, Vuçiq po konsideron gjithashtu mundësinë që të kandidojë për postin e kryeministrit të Serbisë.

Sipas Behlulit, nëse Vuçiq kandidon për kryeministër, ai do të lejohej të hyjë në zgjedhje në një rol tjetër politik. Po ashtu ajo ngriti pyetjen pse ai ka pritur dy vite protesta për të marrë një vendim të tillë. Sipas saj, kjo lidhet me faktin se mandati i Vuçiqit si president përfundon në vitin 2027 dhe kushtetuta e Serbisë nuk i lejon një mandat të tretë presidencial. Ajo shtoi se Vuçiq po e mendon pozicionin e tij të ardhshëm politik, pasi nuk ka ndërmend të tërhiqet nga politika.

“Vuçiq ka paralajmëruar se po shqyrton dorëheqjen brenda tre deri katër muajve. Por në anën tjetër po shqyrton edhe kandidimin e tij për kryeministër. Nëse ai do të kandidojë për kryeministër, po i lejohet Vuçiqit që të hyjë në zgjedhje në një rol tjetër. Pse presidenti Vuçiq është dashur të presë dy vite protesta, por tani po shqyrton mundësinë e dorëheqjes, sepse mandati i tij presidencial përfundon në vitin 2027 dhe kushtetuta e Serbisë nuk i lejon edhe një mandat të tretë që ta ushtrojë rolin e presidentit. Ai e ka menduar pozitën e ardhshme të tij sepse nuk e ka ndërmend të tërhiqet nga politika”, tha Behluli për Klan Kosova.