Bedri Rexhepi varroset të enjten – familjarët thonë se u vra nga ata që i kishte ndihmuar

Mbetjet mortore të Bedri Rexhepit do të varrosen të entjen në orën 13:00 në varrezat e qytetit në Shtime. Kështu ka njoftuar familja e të ndjerit përmes një shkrimi në Facebook, ku thuhet se i ndjeri është vrarë nga një familje të cilës i kishte ndihmuar Bedriu, njofton Klan Kosova. “Duam të ju informojmë që Bedriu ka rënë pre e një mashtrimi me qellim të ulët të grabitjes, në mënyrën më tradhtare. Më e keqja dhe goditësja është se ky akt makabër i është shkaktuar nga një familje të cilës Bedriu jonë vazhdimisht i ka shtrirë dorën e përkrahjes dhe pa aspak hezitim i ka ndihmuar”. Kjo familje i ka falënderuar institucionet shtetërore për zbardhjen e këtij rasti. Më poshtë mund ta lexoni reagimin e plotë: Të dashur bashkëqytetar të Republikës së Kosovës, Pas identifikimit nga Instituti i Mjekësisë Ligjore, ne, familja Rexhepi, sot jemi njoftuar nga organet përgjegjëse se mund ta tërheqim trupin e më të dashurit tone Bedri Rexhepi. Si familje kemi pasur besim në institucionet tona dhe asnjëherë nuk kemi reshtur së kërkuari Bedriun, megjithëse jeta e tij veçse kishte përfunduar më datën 8 prill 2021 nga dora e kriminele (Jeton dhe Nexhat Vllasaliu) të cilët tani janë në dorë të organeve të rendit. Shpresa dhe dëshira jonë në këtë moment është që kriminelët ta marrin dënimin e merituar. Prokurori Hamiti konfirmon – ky është motivi i vrasjes së biznesmenit Rexhepi Njashtu, duam t’ju informojmë që Bedriu ka rënë pre e një mashtrimi me qellim të ulët të grabitjes, në mënyrën më tradhtare. Më e keqja dhe goditësja është se ky akt makabër i është shkaktuar nga një familje të cilës Bedriu jonë vazhdimisht i ka shtrirë dorën e përkrahjes dhe pa aspak hezitim i ka ndihmuar. Ne si familje, lutemi që rasti i Bedriut të jetë i fundit ku në pabesi shuhet jeta e një të riu. Duke qenë në dijeni rreth kompleksitetit të rastit, i falënderojmë të gjitha institucionet e sigurisë në Kosovë (AKI-në, Policinë e Kosovës dhe prokurorin e rastit Armend Hamiti) për mundin, punën e madhe që kanë kryer dhe faktin që nuk ndaluan së qëndruari në krye të detyrës, deri në zbardhjen e rastit për fatin e Bedriut tonë. Njëherit, duam të falënderojmë mediat dhe të gjithë qytetarët e Kosovës që na qëndruan dhe na përkrahën pa rezervë dhe pa ndërprerë gjatë gjithë kësaj periudhe shumë të rëndë për familjen tonë. Ju njoftojmë se varrimi do të bëhet të enjten, 20 tetor 2022, në ora13:00 ( Me namazin e Drekës ) në varrezat e qytetit në Shtime. Me respekt, Familja Rexhepi

klankosova.tv