BE-ja rrit buxhetin për mbështetje ushtarake për shtetet anëtare dhe Ukrainën

Shtetet anëtare të BE-së autorizuan rritjen e buxhetit të Fondit Evropian të Paqes (EPF) deri në 8 miliardë euro deri në vitin 2027 për të siguruar furnizim ushtarak për Ukrainën si dhe për të rimbushur stoqet e vendeve të BE-së. "Këshilli i BE-së miratoi një vendim që rrit maksimumin financiar të EPF-së në 7,979 miliardë euro sipas çmimeve aktuale deri në vitin 2027, duke siguruar që nevojat financiare shtesë të mund të mbulohen", njoftoi përmes një deklarata institucioni i BE-së që përfaqëson shtetet anëtare. Vendimi konfirmon marrëveshjen politike të arritur nga ministrat e Jashtëm të BE-së në dhjetor për rritjen e buxhetit të EPF-së me 2 miliardë euro në 2023 dhe lejimin e një rritjeje të mëtejshme deri në 5,5 miliardë euro deri në vitin 2027, shkruan Anadolu, transmeton Klankosova.tv. Shefi i politikës së jashtme të BE-së, Josep Borrell, e quajti EPF-në "një pjesë integrale të mbështetjes së BE-së për të promovuar paqen dhe sigurinë globale". Ai theksoi se rritja e buxhetit siguron "qëndrueshmërinë financiare të këtij instrumenti", i cili "është thelbësor për mbështetjen tonë jo vetëm për Ukrainën, por edhe për partnerët tanë në pjesë të tjera të Evropës, Afrikës dhe Lindjes së Mesme, pasi nevojat vazhdojnë të lindin". Me ndryshimin e buxhetit, BE-ja do të jetë në gjendje të zbatojë propozimin e fundit të Borrell-it për furnizimin e menjëhershëm të municioneve në Ukrainë dhe të plotësojë rezervat e vendeve anëtare të BE-së me prokurime të përbashkëta. Sipas planit, vendet anëtare të BE-së që dërgojnë municione nga furnizimet e tyre në Ukrainë, mund të rimbursohen nga EPF deri në 1 miliard euro në total. Propozimi gjithashtu parashikon 1 miliard euro të tjera për prokurime të përbashkëta përmes Agjencisë Evropiane të Mbrojtjes. Ministrat e Jashtëm dhe të Mbrojtjes të BE-së pritet të miratojnë nismën në takimin e tyre më 20 mars.