BE-ja paralajmëron masa hakmarrëse ndaj tarifave të Trumpit

Presidentja e Komisionit Evropian, Ursula von der Leyen, e ka cilësuar vendimin e ish-presidentit amerikan, Donald Trump, për vendosjen e tarifave universale si një goditje të rëndë për ekonominë botërore. Ajo ka paralajmëruar se Bashkimi Evropian është i gatshëm të ndërmarrë masa hakmarrëse nëse bisedimet me Uashingtonin dështojnë, raporton Reuters, transmeton Klankosova.tv. “Ne tashmë jemi duke finalizuar paketën e parë të kundërmasave ndaj tarifave për çelikun,” deklaroi Von der Leyen të enjten në Samarkand, Uzbekistan, përpara një samiti të BE-së me vendet e Azisë Qendrore. “Dhe tani po përgatitemi për masa të mëtejshme për të mbrojtur interesat dhe bizneset tona nëse negociatat dështojnë". Ajo nuk dha detaje mbi hapat e ardhshëm të BE-së, por blloku evropian planifikon të vendosë tarifa kundërpërgjigjëse deri në 26 miliardë euro (rreth 28.4 miliardë dollarë) për mallrat amerikane këtë muaj, si përgjigje ndaj tarifave të SHBA-së për çelikun dhe aluminin, të cilat hynë në fuqi më 12 mars. Trump njoftoi të mërkurën një tarifë minimale prej 10% për shumicën e mallrave të importuara në SHBA, ndërsa për Bashkimin Evropian ky tarifim do të jetë më i lartë, duke arritur në 20%. Ky vendim ka intensifikuar luftën tregtare globale, duke rritur shqetësimet për inflacionin dhe ngadalësimin e rritjes ekonomike në SHBA dhe botë. Von der Leyen shprehu keqardhje të thellë për këtë vendim dhe paralajmëroi për “pasoja të mëdha” për ekonominë globale, sidomos për vendet më të cenueshme që përballen me tarifat më të larta amerikane. “Pasiguria do të rritet dhe do të nxisë më shumë proteksionizëm,” tha ajo, duke paralajmëruar për çmime më të larta të produkteve ushqimore, ilaçeve dhe transportit, si dhe ndërprerje në zinxhirët e furnizimit për bizneset. Ajo shtoi se nuk ka qartësi në mënyrën se si po vepron administrata amerikane. “Duket se nuk ka asnjë rregull në këtë kaos që po krijohet, ndërsa të gjithë partnerët tregtarë të SHBA-së po goditen”, tha Von der Leyen. Megjithatë, ajo pranoi se disa vende kishin përfituar padrejtësisht nga rregullat globale të tregtisë dhe shprehu gatishmërinë për të mbështetur përpjekjet për reformimin e tyre.