Bashkimi pranë titullit, Peja 03 kërkon ta zgjasë serinë finale

Peja 03 dhe Bashkimi përballen sot nga ora 18:00 në ndeshjen e pestë të finales së Play-Off-it në Superligën e femrave. Skuadra prizrenase hyn në këtë takim me epërsi 3:1 në seri dhe është vetëm një fitore larg shpalljes kampione të Kosovës, duke synuar ta mbrojë titullin për herë të katërt radhazi. Në anën tjetër, Peja 03 do të kërkojë të mbajë gjallë shpresat për përmbysje, duke synuar fitore para tifozëve të vet në palestrën “Karagaçi”. Forma e fundit është në anën e Bashkimit. Në gjashtë përballjet e fundit mes këtyre dy skuadrave, duke përfshirë edhe finalen e Kupës së Kosovës dhe atë të Ligës Unike, të dyja të fituara nga prizrenaset, Bashkimi ka regjistruar pesë fitore, ndërsa Peja 03 vetëm një, pikërisht në ndeshjen e dytë të kësaj serie finale në Pejë. Për vendaset, kjo ndeshje paraqet një mundësi për të reaguar dhe për ta shtyrë serinë, ndërsa për Bashkimin është shansi ideal për ta mbyllur gjithçka dhe për të konfirmuar dominimin në basketbollin e femrave. Takimi do të transmetohet drejtpërdrejt në Artmotion.