Bashkëlojtarë në Kombëtaren U20, kundërshtarë në finalen e Superligës në Basketboll

Albin Berisha dhe Drilon Shala, janë dy prej shumë talentëve që përfaqësojnë Kombëtaren e Kosovës në Basketboll në kategorinë U20. Megjithatë, tani ata nuk janë duke luajtur në cilësi të bashkëlojtarit por të kundërshtarit, në finalen e Superligës në Basketboll në mes të Pejës dhe Yllit. Në një intervistë për klankosova.tv, Berisha dhe Shala kanë treguar se si e shohin ata finalen në garën më të fortë në basketbollin kosovar dhe si u thirrën për të qenë pjesë e përfaqësueses së Kosovës në Basketboll për kategorinë U20. Për Drilon Shalën, i cili është pjesë e skuadrës së Yllit, edhe pse lojtarët e ri kanë minuta të limituar, ai e vlerëson se eksperienca mund t’i mësojë shumë ata. ''Për neve si lojtarë të ri, që jemi, që kemi minuta më të limituara është një eksperiencë shumë e mirë edhe mundemi të mësojmë shumë prej trajnerit si dhe prej lojtarëve'', thotë Shala. Ndërsa Albin Berisha nga radhët e Pejës konsideron se pavarësisht humbjes në ndeshjen e parë, ende ka shumë për të treguar. ''Finalja nuk ka filluar në mënyrën e duhur për neve. Na gjeti të hendikepuar, pa Aj Walton‘‘. ‘‘Por janë pesë lojë dhe ka shumë për të treguar, mirëpo me rikthimin e Aj Waltonit me ekipin e kompletuar besoj që do të dalim triumfues në fund'', tha Berisha. Ndonëse kanë karrierë të re në basketbollin profesional, të dytë, Berisha dhe Shala, ndjejnë mungesën e prezencës së tifozëve në tribuna. ''Sa i përket tifozëve, na mungojnë shumë por pas çdo loje tifozët tanë janë jashtë salle për ne për te na motivuar. Dihet se dy tifozëritë e ekipeve finaliste janë tifozët më të flaktë të vendit tonë andaj dhe shpresojmë t'i kemi sa më shpejtë ne tribuna'', u shpreh Shala për klankosova.tv. Derisa është Berisha i cili me pak fjalë tregon se titulli duhet fituar pikërisht për tifozët e Pejës. ''Mirëpo edhe pse në mungesë të tyre në palestra, ata janë përkrahja jonë më e madhe - duke na qëndruar jashtë palestrave dhe duke na përkrahur në çdo mënyrë te mundshme''. ''Ndaj jemi shumë mirënjohës për tifozët tanë ''Shqiponjat'', shpërblimi më i mirë i tyre ka me qenë titulli'', tha Berisha. Albini dhe Driloni janë të ndarë në ekipet e tyre kur luajnë në Superligë, mirëpo ata i bënë bashkë vullneti për të qenë përfaqësues në Kombëtaren e Kosovës për grupmoshat U20. Me paraqitjen e tyre të mirë në konkurrenca të reja ndër vite, ata kishin ftesa të shumta që të përfaqësojnë shtetin e tyre në grupmoshat U20, edhe pse për shkak të pandemisë nuk kanë pasur mundësi të luajnë ende. Në vitin 2019 në Kampionatin Europian, Drilon Shala dhe Albin Berisha luajtën për grupmoshat U18. Edhe pse Driloni ishte i lënduar shumicën e kohës, ata patën një paraqitje të mirë individuale. Për Albinin dhe Drilonin kjo është finalja e tyre e tretë në tre gara të ndryshme që janë takuar. Albini dhe Driloni shihen përsëri të martën e 11 majit, në sallën “Karagaqi”, kur përballet Peja kundër Yllit. Ylli është duke avancuar 2 me 0 në serinë e finales së Superligës së Kosovës në Basketboll.  

klankosova.tv