Lajmet e fundit
Lulzim Basha ka thënë se përpjekja e tij për ta mbajtur Partinë Demokratike të bashkuar nuk pati sukses. Ai u deklarua kështu në momentin kur e bëri të ditur dorëheqjen e tij.
"25 prilli ishte një goditje e rëndë për demokratët dhe për shqiptarët, masakra zgjedhore ndali ndryshimin më 25 prill. Shpresa për t'u ringritur ka marrë, për fat të keq, goditje të njëpasnjëshme. Personalisht investova gjithçka për një zgjidhje që do t'i shërbente edhe Partisë Demokratike edhe transparencës. Kush kishte të drejtë e kush ishte gabim, jam i bindur se do ta qartësojë koha".
"Unë dhe shumë demokratë u përballëm me një fushatë sulmesh të paparimta dhe të pavërteta, si rezultat sot Partia Demokratike po përjeton një krizë të thellë. Për këtë arsye dhe për të ndihmuar demokratët të lënë mënjanë ndasitë joparimore, kam vendosur të hedh një hap pas, duke u dorëhequr nga detyra e kryetarit të PD-së, i vendosur për të ndihmuar për ringritjen dhe bashkimin e demokratëve", ka thënë Basha.
Ai ka theksuar se do të vazhdojë të punojë për ringritjen e PD-së, edhe pse më nuk është në pozitën e kryetarit.
"Kjo nuk është një tërheqje, por një nxitje më shumë që betejën tonë për një PD të së ardhmes ta bëjmë të gjithë bashkë, të zhveshur nga çdo shpifje se kjo që ka ndodhur për karrigen e kryetarit. Unë jam dhe do jem tërësisht i angazhuar krah jush, do të bëj gjithçka që t'i japin forcë vizionit tonë për një Parti Demokratike që zgjedh të ardhmen. Kjo do të thotë se unë do të vazhdoj pareshtur e pa u lëkundur të punoj për këtë ringritje të Partisë Demokratike rreth vlerave, parimeve dhe standardeve tona si demokratë"./tch/
