Barcelona monitoron Muriqin, mund të ndodh një transferim “bombë” gjatë verës

Barcelona ka përcaktuar tashmë profilin e sulmuesit që synon të transferojë gjatë verës, në rast se dështon në përpjekjen për të nënshkruar me Julian Alvarez nga Atletico Madrid, ndërsa në listën e alternative ka hyrë edhe sulmuesi kosovar i Mallorcas, Vedat Muriqi. Sipas raportimeve të Diario SPORT, drejtuesit e Barcelonës e kanë ndjekur nga afër për javë të tëra Vedat Muriqin, i cili po kalon një sezon shumë të mirë në La Liga, megjithëse ende nuk ka pasur kontakte zyrtare me përfaqësuesit e tij, transmeton Klankosova.tv. Në moshën 31-vjeçare, sulmuesi kosovar është shndërruar në një nga lojtarët më të spikatur të kampionatit, duke u renditur aktualisht si golashënuesi i dytë më i mirë dhe duke luajtur rol kyç në paraqitjet konkurruese të ekipit të tij. Nga ana tjetër, Muriqi mbetet i përqendruar te përfundimi i sezonit me Mallorcan, pavarësisht interesimit në rritje, duke shtyrë çdo vendim për të ardhmen për në fund të kampionatit. Sulmuesi ka një klauzolë lirimi prej 40 milionë eurosh dhe kontratë të vlefshme deri në vitin 2029, megjithatë sipas raportimit të mediumit spanjoll, njerëzit pranë lojtarit sugjerojnë se një transferim mund të realizohet edhe për një shumë më të ulët, në varësi të zhvillimeve sportive të klubit. Barcelona pritet të vazhdojë monitorimin e sulmuesit deri në fund të sezonit, përpara se të marrë një vendim përfundimtar.