Banka Botërore financon Shqipërinë me 80 milionë dollarë për reduktimin e ndotjes së ujërave

80 milionë dollarë është shuma që Banka Botërore do të financojë Shqipërinë në kuadër të projektit “Mjedis i pastër dhe i qëndrueshëm për Detin Blu”. Ky projekt ka për qëllim reduktimin e ndotjes në mjedisin ujor në zonën jugperëndimore të Shqipërisë, në funksion të zhvillimit të qëndrueshëm të turizmit, raporton tvklan, transmeton Klankosova.tv. Marrëveshja e firmosur me ministrinë e Financave parashikon tre faza, ku pjesa e parë ka të bëjë me promovimin e një qasjeje të integruar dhe qarkulluese për mbrojtjen e mjedisit dhe burimeve ujore. Pjesa e dytë e projektit synon uljen e ndotjes në Lumin Vjosa, kjo edhe në kuadër të mbështetjes dhe mbrojtjes së mëtejshme të tij, pas akordimit të statusit “Park Kombëtar”, si lumi i fundit i egër në Evropë. Projekti do të synojë zgjerimin e infrastrukturës së pastrimit, përmirësimin e mëtejshëm të saj, si edhe parandalimin e ndotjes. Pjesa e tretë parashikon aspekte të menaxhimit, monitorimit dhe vlerësimit sa i përket zbatimit të këtij projekti, i cili parashikohet të zgjasë deri në mars të vitit 2029.