Lajmet e fundit
Të paktën tre persona kanë humbur jetën kur disa burra të armatosur hapën zjarr gjatë një konferencë për media për të njoftuar rinisjen e punës në spitalin më të madh publik të Haiti-t në kryeqytetin Port-au-Prince.
Sulmi, i cili ndodhi të martën në spitalin e përgjithshëm, rezultoi në vdekjen e dy gazetarëve dhe një oficeri policie, ndërsa disa të tjerë u plagosën.
Aleanca e bandës Viv Ansanm, e cila kontrollon shumicën e kryeqytetit, ka marrë përgjegjësinë për sulmin.
Banda kishte okupuar dhe shkatërruar spitalin në mars. Pas ri-kapjes nga qeveria në korrik, spitali ishte gati për t’u rihapur, por ceremonia përfundoi me një përballje të dhunshme.
Gazetarët po prisnin mbërritjen e ministrit të Shëndetësisë, Lorthe Blema, kur nisën të shtënat, raporton BBC, transmeton Klankosova.tv.
Midis viktimave ishin gazetarët Markenzy Nathoux dhe Jimmy Jean, të cilët u vranë gjatë sulmit, sipas Robest Dimanche, zëdhënës i Kolektivës së Mediave Online.
Disa gazetarë të tjerë u plagosën, raporton BBC.
Një oficer policie gjithashtu humbi jetën, tha zëdhënësi i policisë, Lionel Lazarre.
Dieugo André, një foto-gazetar që ishte dëshmitar i dhunës, e përshkroi skenën si “një film të tmerrshëm” dhe tregoi se kishte mbetur i mbuluar me gjakun e gazetarëve të plagosur.
Aleanca e bandës Viv Ansanm, në një video që ka marrë përgjegjësinë për sulmin, tha se nuk kishte autorizuar rinisjen e spitalit, të cilin ata e kishin okupuar dhe shkatërruar më herët këtë vit.
Qeveria kalimtare e Haiti-t shprehu ngushëllime për familjet e viktimave dhe premtoi se sulmi nuk do të mbetet pa pasojë.
Vendi vazhdon të vuajë nga dhuna e përhapur bandore, pavarësisht dërgimit të një force ndërkombëtare të udhëhequr nga oficerë policie kenianë për të rivendosur rendin.
Dhuna në Haiti është përshkallëzuar pas vrasjes së presidentit Jovenel Moïse në vitin 2021, dhe pothuajse 85% e Port-au-Prince është ende nën kontrollin e grupeve të armatosura.
Kombet e Bashkuara raportojnë se deri në 5,000 persona janë vrarë nga dhuna këtë vit, duke e çuar vendin në prag të kolapsit./Klankosova.tv.
