Autoritetet gjermane arrestojnë një libian, dyshohet për planifikimin e një sulmi në ambasadën izraelite

Autoritetet gjermane thanë të dielën se kanë arrestuar një shtetas libian për lidhje të dyshuara me grupin ekstremist Shteti Islamik.

Ai dyshohet se po planifikonte një sulm me armë zjarri në ambasadën izraelite.

Policia dhe forcat e tjera të sigurisë e arrestuan burrin të shtunën në mbrëmje në Bernau, një qytet jashtë Berlinit, dhe kontrolluan shtëpinë e tij atje, tha Zyra e Prokurorit Federal në një deklaratë, raporton Associated Press, transmeton Klankosova.tv.

Zyra e prokurorit tha se i dyshuari ishte një shtetas libian të cilin ata e identifikuan vetëm si Omar A.

“Ai synonte të kryente një sulm të profilit të lartë me armë zjarri në ambasadën izraelite në Berlin”, thuhet në deklaratë. Në planifikimin e tij, shtoi deklarata, "i akuzuari shkëmbeu informacion me një anëtar të IS në një bisedë me mesazhe".

Forcat e sigurisë kanë kontrolluar edhe shtëpinë e një personi tjetër që konsiderohet dëshmitar dhe jo i dyshuar, thuhet në deklaratën e prokurorit.