Asnjë dëmtim serioz për Amir Abrashin

Pas pothuajse dy javësh nën vëzhgimin e mjekëve, 26-vjeçari mori edhe lajmin e mirë. Nëpërmjet një komunikate për shtyp, të transmetuar më pas edhe në mediat më të rëndësishme gjermane, klubi i Freiburg njoftoi se “skaneri nuk evidentoi asnjë dëmtim në kokën e mesfushorit”.Zyrtarët e skuadrës së Bundesligës bën gjithashtu të ditur se “së shpejti mesfushori shqiptar do të kthehet në stërvitje, megjithatë ende nuk është përcaktuar një datë e saktë”. Abrashi ishte shndërruar në një titullar të padiskutueshëm te Freiburgu, që pas tetë javëve të para në Bundesligën gjermane pozicionohet në vendin e tetë. Lojtari që njihet edhe me nofkën “Pitbulli” ka luajtur 6 ndeshje në këtë sezon, ndërsa në dy javët e fundit prej goditjes së pësuar në kokë u detyrua të qëndronte pushim. shkruan SuperSport.al. Diagnoza se Abrashi gëzon shëndet të plot është një lajm i mirë edhe për Kombëtaren shqiptare, me mesfushorin që pritet të vihet në dispozicion të skuadrës, për sfidën e 12 Nëntorit kundër Izraelit në stadiumin “Loro Boriçi”.