“Ask App not to Track” nuk e ndalon gjurmimin

Në iPhonin tuaj mund të prekni një buton që thotë "Ask App not to Track", por në prapaskenë, disa aplikacione vazhdojnë të përgjojnë. Apple prezantoi opsionin “Ask App not to Track” me lëshimin e iOS 14.5, për t'u dhënë përdoruesve më shumë kontroll mbi atë se sa nga të dhënat e tyre ndahen me palët e treta për qëllime të tilla si reklamim. Megjithatë, rezulton se ju nuk keni aq shumë kontroll sa keni menduar. Një studim nga Lockdown Privacy zbuloi se ndërsa përdoruesit kishin aktivizuar opsionin për të parandaluar gjurmimin nga aplikacionet dhe faqet e internetit në pajisjet e tyre, disa aplikacione po mblidhnin ende të dhënat e përdoruesit, transmeton Klankosova.tv. "Ne zbuluam se Transparenca e Gjurmimit të Aplikacioneve nuk bëri asnjë ndryshim në numrin total të gjurmuesve aktivë të palëve të treta", thotë studimi. "Ne konfirmuam më tej se të dhënat e detajuara personale ose të pajisjes po dërgoheshin te gjurmuesit në pothuajse të gjitha rastet". Një zëdhënës i kompanisë Apple tha se kur përdoruesi zgjedh ’I kërkoj aplikacionit të mos gjurmojë’, aplikacioni informohet se përdoruesi nuk do të donte të gjurmohej në asnjë mënyrë dhe të gjithë zhvilluesit - përfshirë Apple - u kërkohet rreptësisht të pajtohen me zgjedhjen e përdoruesit. “Nëse zbulojmë se një zhvillues nuk po respekton zgjedhjen e përdoruesit, ne do të punojmë me zhvilluesin për të adresuar problemin, ose ata do të hiqen nga App Store”, tha zëdhënësi. Studimi i fundit thekson se ndërsa Apple e ka pozicionuar veten si një kampion i privatësisë në mesin e një morie gjigantësh të teknologjisë që dëshirojnë të shfrytëzojnë dhe mbledhin të dhënat e përdoruesve, mbrojtja e saj aktuale e privatësisë është shumë larg pretendimeve të saj.