Asgjësohen afro 8 mijë produkte ushqimore për fëmijë nga “Aptamil” dhe “Nutricia Bebelac”  

Agjencia e Ushqimit dhe Veterinarisë (AUV) ka njoftuar se në bashkëpunim me kompaninë UNION shpk, është realizuar asgjësimi i 7,998 copë produkte ushqimore për fëmijë, të markave "Aptamil" dhe "Nutricia Bebelac", me peshë totale prej 4,130.80 kg. Sasia e asgjësuar, sipas AUV -it, është specifikuar sipas datave të skadencës, në përputhje me njoftimet e pranuara nga Njësia e Alarmit të Shpejtë për Ushqim dhe Ushqim për Kafshë (RASFF). "AUV aktualisht është në proces të verifikimit dhe gjurmueshmërisë për të konstatuar nëse ndonjë sasi e këtyre produkteve ka mbetur ende në treg.Agjencia e Ushqimit dhe Veterinarisë mbetet e përkushtuar në monitorimin e vazhdueshëm të tregut dhe në zbatimin e masave parandaluese dhe kontrolluese, me qëllim garantimin e sigurisë ushqimore dhe mbrojtjen e shëndetit të konsumatorëve në Republikën e Kosovës”, thuhet në njoftim./Klankosova.tv.