Një nga prioritetet e mandatit të katërt të Qeverisë së Edi Ramës, është transformimi digjital i arsimit.
Por duket se sfidë mbetet infrastruktura dhe aftësia e stafit pedagogjik, transmeton klankosova.tv.
Në një pyetësor të Ministrisë së Arsimit në Shqipëri, me 332 mësues nga shkolla të ndryshme të Shqipërisë në 7 bashki, rezulton se gati gjysma e arsimtarëve, rreth 48%, pohuan se shkollat e tyre nuk kanë pajisje të mjaftueshme teknologjike apo kanë probleme të vazhdueshme me lidhjen në internet.
Mungesa e infrastrukturës së përshtatshme teknologjike cilësohet si një ndër pengesat që ndikon drejtpërdrejt në aftësinë e mësuesve për të përfshirë teknologjinë në mënyrë të qëndrueshme dhe krijuese në orët e mësimit, sipas analizës së Agjencisë së Sigurimit të Cilësisë së Arsimit Parauniversitar.
Pyetësori i Agjencisë së Sigurimit të Cilësisë së Arsimit Parauniversitar: “Vetëvlerësimi i mësuesve në fushën e kompetencës digjitale pasqyron një nivel të lartë të aftësive bazike, me mbi 70% të tyre që ndihen të aftë në përdorimin e mjeteve standarde teknologjike. Sidoqoftë, kur bëhet fjalë për integrimin pedagogjik të teknologjisë apo përdorimin kritik dhe krijues të saj, vetëbesimi bie dukshëm.”
Në vetëdeklarimin e kompetencave digjitale, vetëm 34% e të anketuarve ishin shprehur se ndjekin trajnime të strukturuara në këtë fushë, çka tregon për një hendek të qartë mes njohurive teknike dhe kompetencave pedagogjike të integruara. Ndikim duket se kanë edhe faktorët demografikë dhe ata profesionalë.
Pyetësori i Agjencisë së Sigurimit të Cilësisë së Arsimit Parauniversitar: “Rezultatet sugjerojnë një lidhje të qartë midis nivelit të kompetencës digjitale dhe faktorëve si mosha, përvoja profesionale dhe profili i mësuesit. Mësuesit më të rinj dhe ata që japin lëndë tekniko-shkencore kanë prirje të jenë më të sigurt dhe më të shkathët në përdorimin e TIK, ndërsa mësuesit më të moshuar dhe të lëndëve shoqërore raportojnë më shumë vështirësi.”
Të dhënat e siguruara nga Top Channel tregojnë se rreth 60% e mësuesve raportojnë përdorim të rregullt të TIK në procesin mësimor, ndërkohë që 40% e tyre shfaqin një përdorim më të kufizuar apo rastësor.
Përdorimet më të zakonshme përfshijnë kërkimin e informacionit (82%), përgatitjen e materialeve mësimore (79%) dhe komunikimin me nxënësit (63%). Megjithatë, sondazhi nxjerr në pah se përdorimi i teknologjisë për qëllime më të përparuara, si projektet bashkëpunuese apo vlerësimin e vazhduar, mbetet ende në nivele të ulëta te mësuesit.
