Pas më shumë se 3 vjetësh arrati, është arrestuar Muhamet Gashi, i dyshuari për vrasjen të rëndë që ka ndodhur në Lipjan më 5 gusht të 2022-tës, ku viktimë ishte 22 vjeçari Dardan Gashi.
Sipas njoftimit zyrtar, ndaj të dyshuarit është lëshuar aktvendim për ndalim prej 48 orësh. Gjatë arrestimit, autoritetet kanë sekuestruar dy armë, substanca narkotike si dhe dokumente të falsifikuara, të cilat dyshohet se i ka përdorur gjatë kohës së arratisë për të shmangur identifikimin nga organet e rendit.
Në kuadër të këtij aksioni është arrestuar edhe një person tjetër, i dyshuar për veprën penale “Dhënia e ndihmës kryerësit pas kryerjes së veprës penale”, sipas nenit 380 të Kodit Penal të Republikës së Kosovës.
Prokurori i shtetit ka bërë të ditur se hetimet do të vazhdojnë dhe se do të shqyrtohet mundësia e kërkesës për masa shtesë për sigurimin e prezencës së të pandehurit në procedurën penale.
Autoritetet kanë theksuar përkushtimin e tyre që të gjithë personat e përfshirë në vepra penale të sillen para drejtësisë.
Derisa një muaj pas ngjarjes së rëndë, në polici ishte dorëzuar Gazmend Selimi.
Shënim: Personi/personat e përmendur në këtë artikull, prezumohen të pafajshëm deri në një vendim të formës së prerë nga gjykata.
●●●
ASHKRIMI NGA
albert
Editorial nga Klan Kosova — ndjek lajme dhe zhvillimet e tjera kryesore të vendit.