Arrestohen shtatë persona në Durrës, gjuanin me armë zjarri – Postonin videot në rrjetet sociale

Policia e Durrësit ka arrestuar shtatë persona pasi kryenin qitje gjatë natës me armë zjarri me qëllim që videot t’i postonin në rrjete sociale. Ata janë proceduar për armëmbajtje pa leje, ndërkohë që është proceduar penalisht dhe një shtetas i mitur. “Në pranga ka përfunduar shtetasi Nj. S., 56 vjeç, së bashku me djalin e tij 19-vjeçar të cilët akuzohen për veprat penale ‘Mbajtja pa leje dhe prodhimi i armëve, armëve shpërthyese dhe i municionit’. Gjithashtu u arrestuan dhe shtetasit: K. P., 19 vjeç, K. J., 20 vjeç, A. T., 18 vjeç, A. H., 19 vjeç dhe E. T., 19 vjeç, të gjithë banues në Tiranë, për veprën penale “Moskallëzimi i krimit .Në vijim të operacionit, u referuan materialet në Prokurori, ku nisi procedimi në gjendje të lirë për një 17-vjeçar, për veprën penale “Moskallëzimi i krimit”. “Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme”. “7 të rinjtë e arrestuar/proceduar u kapën në flagrancë pas sigurimit të informacionit, se ata po përgatiteshin për të qëlluar në kodrën e fshatit Hamallaj, me armë zjarri që i posedonin pa leje, me qëllim postimin e videove në rrjetin social “TikTok”. “Gjatë operacionit u gjet arma e zjarrit kallashnikov me të cilën të rinjtë kryenin qitje. Në vijim, gjatë kontrollit në banesën e shtetasve Nj. S. dhe M. S., ku u kap 56-vjeçari, Policia gjeti dhe sekuestroi një armë zjarri pushkë dhe municion luftarak. Së bashku me armët, u sekuestruan 2 automjetet me të cilat lëviznin këta shtetas, si dhe 8 celularë”, thuhet në njoftimin e policisë. /euronews.al