Lajmet e fundit
Policia mbrëmë ka zhvilluar një operacion policor në rajonin e Prishtinës, i cili ka përfshirë katër lokacione të ndryshme.
Katër persona janë arrestuar nga ky operacion nën dyshimin se mënyrë të organizuar si grup i rrezikshëm kriminal, dyshohet se kanë kryer vepra penale si: “vrasje në tentativë”, “shkaktim i rrezikut të përgjithshëm”, “lëndim i rëndë trupor”, “zjarrvënie”, “detyrim” dhe “armëmbajtje pa leje”, duke u paguar kështu për këto shërbime, me qëllim të frikësimit dhe lëndimit të viktimave, njofton Klankosova.tv.
“Deri më tani janë identifikuar disa viktima të cilat dyshohet se janë përcjellë për një kohë të caktuar nga ky grup kriminal.
Viktimat janë të profileve të ndryshme, ku disa nga viktimat e identifikuara kanë qenë direkt të sulmuar, të cilët edhe kanë pësuar lëndime trupore” thuhet në njoftimin e policisë.
“Të dyshuarit e arrestuar janë: D. S. viti i lindjes 1980 m/kosovar, Xh. M. viti i lindjes 1979 m/kosovar, H. H. viti i lindjes 1960 m/kosovar dhe T. Sh. viti i lindjes 1973 m/kosovar”.
Gjatë këtij operacioni, policia ka kryer edhe bastisje në prona dhe shtypini banimi të të dyshuarve, ku në cilësi të provave materiale janë sekuestruar:
• dy armë të gjata, katër armë të shkurtra, 43 fishekë, 5000 euro, dy automjete, katër telefona dhe disa mjete të forta.
Me vendim të prokurorit kompetent nga Prokuroria Themelore në Prishtinë, katër të dyshuarit e arrestuar janë dërguar në mbajtje, për të vazhduar me procedura të mëtejme ligjore.
Policia e Kosovës apelon tek të gjithë qytetarët e R. Kosovës të cilët kanë qenë apo edhe ende janë viktimë e përfshirjes së veprave penale në fjalë, të lajmërohen në Polici në stacionet më të afërta, apo edhe të kontaktojnë në linjat telefonike të bëra publike.
