Arrestohen dy persona në Prishtinë për shkaktim të rrezikut të përgjithshëm

Janë arrestuar dy persona në Prishtinë për shkaktim të rrezikut të përgjithshëm të ndodhur në nëntor të vitit të kaluar në rrugën “Fahri Fazliu” në Prishtinë. Policia ka njoftuar se njëri nga të arrestuarit është 19 vjeçar, ndërsa tjetri 21, përcjell Klankosova.tv. “Sot nga zyrtarët e njësisë së hetimeve të përgjithshme të Drejtorisë Rajonale të Policisë në Prishtinë, janë arrestuar dy persona të  dyshuar për rastin e shkaktimit të rrezikut të përgjithshëm të ndodhur më datë 22.11.2023 rreth orës 23:45, në rrugën “Fahri Fazliu” në Prishtinë”. “Arrestimi i të dyshuarve; Sh. S, mashkull, 19 vjeç, shtetas i Republikës së Kosovës, K. S, mashkull, 21 vjeç, shtetas i Republikës së Kosovës, respektivisht sigurimi i prezencës së tyre, erdhi si rezultat i  ndërmarrjes së veprimeve të nevojshme operativo-policore, në kuadrin e procesit hetimor të këtij rasti”. “Përderisa policia po punon për zbardhjen e plotë të rrethanave të ngjarjes, ndaj të dyshuarve me autorizimin e prokurorit të shtetit është iniciuar hetim në drejtim të veprave penale "Shkaktimi i Rrezikut të Përgjithshëm”,  nga neni 356, si dhe, “Mbajtja në pronësi, kontroll ose posedim të pa autorizuar të armëve”, nga neni 366. Të njëjtit me aktvendim mbi ndalimin e personit të dyshuar të nxjerrë nga ana e prokurorit të shtetit u dërguan në qendrën e mbajtjes prej 48 orësh”, thuhet tutje në komunikatën e policisë.