Lajmet e fundit
Gjykata e Apelit e ka vërtetuar dënimin prej 24 vitesh burgim ndaj Skender Qerimajt, për vrasje të bashkëshortes dhe kryerjen e tri veprave tjera penale.
Gjykata Themelore në Mitrovicë, më 12 shtator 2022, kishte shpallur aktgjykim dënues ndaj Qerimajt, duke e dënuar me dënim unik prej 24 vitesh burgim dhe 500 euro gjobë, për vrasje të bashkëshortes dhe kryerjen e tri veprave tjera penale, raporton “Betimi për Drejtësi”.
Sipas aktgjykimit, i akuzuari Qerimaj për veprën penale “Lëndim i lehtë trupor” ishte dënuar me 1 vit e 6 muaj burgim, për “Dhunë në familje” ishte dënuar me 1 vit burgim dhe 500 euro gjobë, për “Vrasje të rëndë”, ishte dënuar me 22 vite burgim, kurse për armëmbajtje pa leje, me një vit burgim.
Kundër këtij aktgjykimi, ankesë në Gjykatën e Apelit për shkak të vendimit lidhur me sanksionin penal, kishin parashtruar mbrojtësi i të akuzuarit Skender Qerimaj, avokati Elvir Imeri, si dhe prokurorja e rastit Fetije Bajrami.
Prokuroria kishte propozuar që aktgjykimi i shkallës së parë të ndryshohet dhe ndaj të akuzuarit të shqiptohej një dënim më i ashpër.
Në anën tjetër, mbrojtësi i të akuzuarit, avokati Imeri, kishte propozuar që ndaj të mbrojturit të tij të shqiptohej një dënim më i butë.
Ndërkaq, Gjykata e Apelit më 23 dhjetor 2022 ka refuzuar këto ankesa të palëve si të pabazuara, duke vërtetuar aktgjykimin e shkallës së parë.
“Duke shqyrtuar çështjen përkitazi me vendimin për dënimin Gjykata e Apelit gjen se pretendimet ankimore të prokurorisë se dënimi i shqiptuar është i butë dhe jo adekuat me rrezikshmërinë shoqërore të veprës penale, ndërsa ato të mbrojtësit të akuzuarit se dënimi është i ashpër, nuk janë të bazuara”, thuhet në vendim.
Tutje, sipas këtij vendimi prokuroria në ankesë nuk ka paraqitur asnjë rrethanë rënduese konkrete, të cilën gjykata e shkallës së parë nuk e ka marrë parasysh.
Po ashtu, në vendim thuhet se vendimi i shkallës së parë është i drejtë dhe i ligjshëm.
“Rezulton se dënimi i shqiptuar i të akuzuarit, është i drejtë dhe i ligjshëm dhe në harmoni me shkallën e rrezikshmërisë shoqërore të veprës penale dhe me shkallën e përgjegjësisë penale të të akuzuarit, po ashtu i njëjti është në funksion të preventives gjenerale por edhe asaj individuale dhe se me dënimin e shqiptuar do të arrihet qëllimi i dënimit i paraparë me dispozitat e nenit 38 të KPK-së”, thuhet në vendim.
Ndryshe, Prokuroria Themelore në Mitrovicë më 12 maj 2022 ka ngritur aktakuzë kundër Skender Qerimajt.
Në pikën e parë të aktakuzës, thuhet se në muajin korrik të vitit 2021, i akuzuari Qerimaj në shtëpinë e tij në fshatin Llaushë, Komuna e Skenderajt, rreth orës 5 të mëngjesit me dashje i ka shkaktuar lëndim trupor bashkëshortes së tij L.Q.
Rasti thuhet se ka ndodhur, ashtu që pas mosmarrëveshjeve të vazhdueshme mes tyre, i akuzuari merr një çarçaf dhe me të e shtrëngon në fyt të dëmtuarën, me ç’rast i shkakton lëndime të lehta trupore – ndrydhje në pjesën e përparme dhe anësore në të dy anët e qafës dhe në pjesën mollëzore të majtë të fytyrës, me pasoja të përkohshme për shëndetin.
Me këtë, akuzohej se ka kryer veprën penale “Lëndimi i lehtë trupor” nga neni 185, par.3, lidhur me par.2 dhe 1 pika 1.4 të KPRK-së.
Ndërsa, në pikën e dytë të aktakuzës thuhet se i akuzuari Qerimaj më 1 janar 2022, rreth orës 10:00, në shtëpinë e përbashkët familjare në fshatin Llaushë, Komuna e Skenderajt, ka ushtruar dhunë psiqike me qëllim të cenimit të dinjitetit të personit tjetër dhe atë ndaj bashkëshortes së tij – tani të ndjerës L.Q.
Sipas aktakuzës, thuhet se i akuzuari e ka fyer me fjalë dhe i ka thënë “dil nga shtëpia, se je kah më tradhëton”, dhe atëherë djali i tyre, tani dëshmitari A.Q, ka lajmëruar policinë, me ç’rast policia arrin në shtëpinë e të pandehurit dhe i dërgojnë në stacionin policor.
Me këtë, akuzohej se ka kryer veprën penale “Dhuna në familje” nga neni 248, par.1 të KPRK-së.
Tutje, në pikën e tretë të aktakuzës, i akuzuari Qerimaj ngarkohej se më 5 janar 2022, rreth orës 13:30 në fshatin Llaushë, Komuna e Skënderajt, me dashje ka privuar nga jeta bashkëshorten e tij – tani të ndjerën L.Q.
Në aktin akuzues thuhet se pas një mosmarrëveshje të vazhdueshme mes tyre, në shtëpinë e përbashkët familjare, gjegjësisht në dhomën e ndejës, i akuzuari ka kërkuar nga vajza e tij e mitur A.Q., që t’ia sjellë një gotë ujë.
Aktakuza thotë se pasi vajza ka shkuar në kuzhinë ka dëgjuar një krismë, është kthyer në sallon dhe ka parë babain e saj duke shkrepë armën – pistoletën e markës “Zoraki” dhe atë 6 herë në drejtim të tani të ndjerës-bashkëshortes së tij L.Q
E ndjera thuhet se është goditur në trup dhe si pasojë e plagëve ka ndërruar jetë gjatë rrugës për në Spitalin rajonal të Mitrovicës.
Me këtë, akuzohej se ka kryer veprën penale “Vrasje e rëndë” nga neni 173, par.1, nënpar.1.3 të KPRK-së.
Ndërsa, në pikën e fundit të aktakuzës i akuzuari Qerimaj ngarkohej se nga data dhe viti i pacaktuar e gjerë më 5 janar 2022 në shtëpinë e tij në fshatin Llaushë, Komuna e Skenderajt, ka mbajtë në posedim armë në shkelje me ligjin e zbatueshëm – Ligjin mbi armët të Republikës së Kosovës, dhe atë pistoletën e markës “Zoraki” model M 9060B.
Sipas aktakuzës, të njëjtën armë i akuzuari pas kryerjes së veprës penale të “Vrasjes” e ka dorëzuar në polici së bashku me tre fishekë.
Me këtë, akuzohej se ka kryer veprën penale “Mbajtja në pronësi, kontroll ose posedim të paautorizuar të armëve” nga neni 366, par.1 të KPRK-së. /BetimipërDrejtësi/
