“Anëtarët e Bordit të ZRrE-së shmangën Komisionin, shkuan në zyrën e GP të LVV-së”

Lajmi i plotësuar me reagimin e ZRrE-së Komisioni për Ekonomi, Industri, Ndërmarrësi, Tregti dhe Inovacion thirri mbledhje të jashtëzakonshme në të cilën ishte paraparë edhe raportimi nga Bordi i Rregullatorit të Energjisë (ZRrE), lidhur me vendimin për tarifat e energjisë elektrike. Por mbledhja e komisionit që u thirr për mëngjesin e së premtes, dështoi për shkak të mungesës së kuorumit, pasi në sallë nuk u paraqitën deputetët e LVV-së, raporton Klankosova.tv. Anëtari i AAK-së, Besnik Tahiri, që ishte i pranishëm në mbledhje, tha se Bordi i ZRrE-së po i ik përgjegjësisë dhe theksoi se kjo e konfirmon se sa të ndikuar politikisht nga LVV-ja dhe Qeveria janë ata. “Mospjesëmarrja dhe ikja nga përgjegjësia e Bordit të ZRrE-së, ma konfirmon ndikimin e plotë politik të LVV-së, të Qeverisë, mbi ta. Kryesuesja ma konfirmoi që ata janë këtu, por së pari kanë shkuar lart, por ata e kanë detyrën me qenë para nesh”, deklaroi Tahiri. Ndërkaq Klan Kosova, nga burimet ka mësuar se anëtarët e Bordit të ZRrE-së kanë qenë brenda hapësirave të Kuvendit, por që të njëjtit kanë shkuar direkt në zyrën e Grupit Parlamentar të LVV-së në Kuvend. Sipas Rregullores së punës së Kuvendit, anëtarët e Bordit të ZRrE-së duhet të presin në korridor para se të ftohen nga Komisioni. Të njëjtit nuk janë paraqitur fare në mbledhjen e thirrur për raportim për çështjen e çmimit të rrymës dhe për çështjen e njehsorëve. Zëvendëskryetarja e Komisionit, Janina Ymeri, tha se “ky mund të jetë fundi i pushtetit të Vetëvendosjes”. “Megjithatë, kjo nuk e ndalon punën në taransparencë. Kam prova të mjaftueshme se hajnia në sektorin në energji është skandali më i madh që ka ndodhur ndonjëherë, madje-madje ka mbërri edhe në Ministri. Sado që mundohen t’i fshehin informatat, dikur do të dalin”, deklaroi deputetja e LDK-së. Deputetët e PDK-së, Ferat Shala dhe Uran Ismaili, thanë se është shqetësuese se si nuk marrin pjesë deputetët e LVV-së. Në këtë komision, sipas deputetëve, do të kuptohej më shumë rreth tarifave të reja.

---

Pas raportimit në Klan Kosova në lidhje me mospjesëmarrjen e anëtarëve të Bordit të ZRrE-së në Komisionin për Ekonomi, ka reaguar ky institucion. Klan Kosova nga burimet ka mësuar se anëtarët e Bordit të ZRrE-së kishin mbërritur në ndërtesën e Kuvendit, mirëpo të njëjtit nuk kanë pritur për t’u thirrur në Komision, por kanë shkuar në Zyrën e Grupit Parlamentar të LVV-së. E ZRrE ka konfirmuar se kanë fizikisht të pranishëm në Kuvend, të “gatshëm për të raportuar dhe për t’iu përgjigjur pyetjeve të deputetëve”. Megjithatë, ZRrE thotë se mbledhja e Komisionit nuk u zhvillua për shkak të mungesës së kuorumit të nevojshëm. “Bordi i ZRRE-së shpreh keqardhje që disa raportime mediale kanë rezultuar të pasakta  dhe kanë keqinformuar opinionin publik lidhur me mosprezencën dhe gatishmërinë e Bordit për raportim”. “Duke qenë të përkushtuar ndaj transparencës së plotë dhe komunikimit korrekt me publikun, Bordi i ZRRE-së fton të gjitha mediat që, para publikimit të çfarëdo informacioni që lidhet me ZRRE-në, të verifikojnë burimet dhe të drejtohen pranë ZRrE-së për të siguruar informim të saktë dhe zyrtar”, tha ZRrE në reagim. /Klankosova.tv